නිදහස් උළෙල සැමරීමට අවශ්ය වියදම් ඇස්තමේන්තු ගත කිරීමේ දී හා වියදම් කිරීමේ දී රටේ වත්මන් මුල්ය තත්ත්වය පිළිබඳ අවධානය යොමු කිරීම දේශපාලන අධිකාරියේ වගේම නිලධාරීන්ගේ වගකීමක් ජනාධිපති රනිල් වික්රමසිංහ මහතා පවසනවා.
ජනාධිපතිවරයා මේ බව කියා සිටියේ නිදහස් දිනය සමරුව පිළිබඳව නිලධාරීන් සමඟ අද (26) පැවැති සාකච්ඡාවකදීයි.
එහිදී ඔහු කියා සිටියේ 75 වන නිදහස් උත්සවය සැමරීමට වෙන් කර ඇති මුදල් ප්රතිපාදන සම්බන්ධයෙන් ජනතාවගේ දැවැන්ත විරෝධයක් පවතින බවයි.
ජනතාවගේ විරෝධය සලකා නිදහස් දින උත්සවයේ වියදම් අවම කර ගැනීමට කටයුතු කරන ලෙසයි ජනාධිපතිවරයා එහිදී නිලධාරීන් වෙත දැනුම් දී ඇත්තේ.
මේ අනුව නිදහස් දින සැමරුම අභිමානවත් සහ අවම පිරිවැයක් යටතේ සැමරීමට මෙහිදී වැඩිදුරටත් අවධානය යොමුව තිබෙනවා.
“සමහර ඇස්තමේන්තු ගැන මම පුදුම වුණා. ඩී.එස්. සේනානායක මහතාට මල්මාලා දාන්න රුපියල් 97,000ක්. එ.ජා.ප.යෙන් කරද්දි වියදම් කළේ මල්මාලාවලට විතරයි. මම දන්නේ නැහැ රුපියල් 97,000 ක් වුණේ කොහොමද කියලා. ජාතික ගීය ගයන්න රුපියල් ලක්ෂ 18ක් ඉල්ලලා. අපි නම් ඉස්සර කළේ.. ප්රවාහන දීමනා සහ ආහාර දුන්නා. ලේකම්තුමා මේ වියදම් ගැන බලන්න ඕනේ.
මම උදාහරණයක් කියන්නම්, සෞන්දර්ය විශ්වවිද්යාලයෙන් ප්රසංගයක් කරනවා. ඒකට අවශ්ය මුදල් ඒ අයම හොයාගන්නවා. අපි දෙන්නේ නෙළුම් පොකුණ නොමිලේ දෙන එක විතරයි. අන්න එහෙම අපි වැඩකටයුතු කරන්න ඕනේ.
75 වන සංවත්සරය තියන්න ඕනේ. අපි ඒක කරන්නේ නැත්නම් රටටටයි හොඳ නැත්තේ. ලෝකය කියයි මේක කරන්නත් සල්ලි නෑ කියලා. ආයෝජකයෝ, සංචාරකයෝ ගේන්න නම් මේ වගේ වැඩ කරන්න ඕනේ”