පැවැත්වීමට නියමිත 2024 ජනාධිපතිවරණය හේතුවෙන් පසුගිය 18 වැනිදා සිට ජනාධිපතිවරණය පැවැත්වෙන එළැඹෙන 21 වැනිදා දක්වා ජනාධිපති අපේක්ෂකයන් ප්‍රවර්ධනය වන ආකාරයේ කිසිදු ප්‍රචාරණ කටයුත්තක් සිදුකළ නොහැකි බවට මැතිවරණ කොමිසම නිවේදනය කළා.
ජනාධිපතිවරයා තෝරා පත්කරගැනීමේ පනත අනුව එවැනි ක්‍රියාවක් නීතිවිරෝධී ක්‍රියාවක් වන බවත් එවැනි අපේක්ෂකයෙකුට එරෙහිව නීතිය ක්‍රියාත්මක කළ හැකි බවත් මැතිවරණ කොමිෂන් සභාව පවසා සිටියා.
එවන් පසුබිමක මෙවර ජනාධිපතිවරණය සඳහා ස්වාධීන අපේක්ෂකයෙකු ලෙස ඉදිරිපත් වී සිටින වත්මන් ජනාධිපති රනිල් වික්‍රමසිංහ මහතා සමඟ ඊයේ (19) උදෑසන සිදුකරන ලද සම්මුඛ සාකච්ඡාවක් ඉන්දියානු Youtube නාලිකාවක විකාශය කර තිබෙනවා.
ඒ අනුව First Post නම් Youtube නාලිකාව හරහා ජනප්‍රිය මාධ්‍යවේදිනියක් වන පල්කි ශර්මා සමඟ මෙරටදී සිදුකරන ලද මෙම සම්මුඛ සාකච්ඡාවේදී ජනාධිපති අපේක්ෂක රනිල් වික්‍රමසිංහ මහතා ‘නිහඬ කාලයේ’ තම හඬ අවදි කිරීම විශේෂත්වයක්.
වසර ගණනාවක මැතිවරණ අත්දැකීම් ඇති, මැතිවරණ නීති පිළිබඳව ඉතා හොඳ දැනුමක් ඇති පුද්ගලයෙක් වන රනිල් වික්‍රමසිංහ මහතා මෙම සාකච්ඡාවට සහභාගි වීමෙන් මැතිවරණ නීති උල්ලංඝනය වන බව දැන දැනම සිදුකරන ලද ක්‍රියාවක් බවට සමාජ මාධ්‍යයන්හී දැඩි විවේචනයට ලක්ව තියෙනවා.
මේ සම්බන්ධයෙන් මැතිවරණ කොමිෂන් සභාව ගන්නා වූ ක්‍රියාමාර්ගය පිළිබදව සාධාරණ මැතිවරණයක් බලාපොරොත්තුවෙන් සිටින සියලු පුරවැසියන් බලාසිටින බවද සමාජ මාධ්‍යයන්හී අදහස් පලව තිබෙනවා.
