එක්සත් ජාතික පක්ෂයේ ගම්පහ ආසන සංවිධායක වරුණ රාජපක්ෂ සහ යටිනුවර ආසන සංවිධායක මහේෂ් සේනානායක මහතා සජිත් ප්‍රේමදාස මහතාට සහාය පළ කිරීමට අද (26) සමගි ජන බලවේගය සමඟ එක්ව තිබෙනවා.
එහිදී ඔවුන් මාධ්‍ය වෙත අදහස් දක්වමින් කියා සිටියේ දකුණේ දේශපාලන මතය දිනවිමට සියලු දේශපාලන පක්ෂ වෘත්තිය සමිති ආදී සියලු දෙනා එක්විය යුතු බවයි.
රට මේ වෙලාවේ තිරණාත්මක සංධිස්ථානයකට පැමිණ ඇති බවත් ජනාධිපතිවරණයේ පරජයත් සමග එක්සත් ජාතික පක්ෂයේ නායක රනිල් වික්‍රමසිංහ මහතා දේශපාලනයට නොපැමි‍ණෙන බවත් මෙහිදී මාධ්‍ය වෙත අදහස් දැක්වු වරුණ රාජපක්ෂ මහතා පැවසුවා.
මෙවර මැතිවරණ ප්‍රතිඵලය අනුව ජයගත් අනුර කුමාර දිසානායක මහතාද ප්‍රතිශතය අනුව ජය ගත්තේ දකුණු ඉවුරේ පක්ෂ බවත් දකුණ ඉවුරේ පක්ෂ, කොටස් දෙකකට වෙන් විම නිසා පරාජය වුන බවත් ඔහු සඳහන් කළා.
එසේම මෙහිදී අදහස් දක්වමින් යටිනුවර ප්‍රධාන සංවිධායක මහේෂ් සේනානායක මහතා කියා සිටියේ දකුණු ඉවුරේ දේශපාලනය පසුබෑමකට ලක්ව ඇති නමුත් එය රටට අවශ්‍ය බවයි.
එසේම කණ්ඩායම්වලට බෙදුනහොත් රට විනාශ වන බව පැවසු මහේෂ් මහතා වමේ දේශපාලනයෙන් රටවල් දියුණුවි නැති බව සඳහන් කළා
තවද ජනතාව නොමග නොයවා එක් ප්‍රතිපත්තියක් මතයක් වෙනුවෙන් පෙනී සිටිය යුතු බවත් අභියෝග රැසක් රටට ඇති නිසා මෙම අභියෝග ජය ගැනිමට දකුණේ කදවුර ශක්තිමත් කළ යුතු බවත් ඒ සදහා සියලු දෙනා එකට එකතු විය යුතු බවත් ඒ මහතා මෙහිදී අවධාරණය කර සිටියා.
