ලසන්ත වික්‍රමතුංඝ අනුස්මරණ උළෙලට සමගි ජනබලවේගය පක්ෂයක් හැටියට සහභාගී නොවීම වරදක් යැයි එහි මහලේකම් පාර්ලිමේන්තු මන්ත්‍රී රංජිත් මද්දුමබණ්ඩාර මහතා පවසයි.
ස.ජ.බ මහලේකම්වරයා මේ බව පවසා තිබුණේ ලසන්ත වික්‍රමතුංග මහතාගේ ඝාතකයන්ට දඬුවම් කිරීම ප්‍රධාන පොරොන්දුවක් කරගත් යහපාලන ආණ්ඩුව නියෝජනය කළ සමගි ජනබලවේගය ඒ මහතාගේ 12 වැනි ගුණානුස්මරණයට පක්ෂයක් හැටියට සහභාගී නොවීම ගැන ‘ලංකාදීප’ පුවත්පතෙන් ඇසූ පැනයකට පිළිතුරු වශයෙනි.
අනුස්මරණ උළෙලට සහභාගී නොවීම වරදක් වුවත් එය ඔහුව අමතක කිරීමක් නොවන්නේ යැයි පවසන හෙතෙම ජනමාධ්‍ය විපක්ෂය විවේචනයට වඩා ලසන්ත ඝාතන විමර්ශකයන් ගැන සොයාබලනවා නම් වඩා හොඳ යැයි ද අවධාරණය කර ඇත.
ලසන්ත වික්‍රමතුංග ඝාතන විමර්ශනයේ නිලධාරින්ව සිරගත කර මරණ තර්ජන එල්ල කරන තත්ත්වයක් ඇතැයි ද ජනමාධ්‍ය ඒවා ගැන උනන්දු නැතැයි ද ස.ජ.බ මහලේකම්වරයා පවසා ඇත.
අපරාධ විමර්ශකයන්ට මරණ තර්ජන එල්ල වී ඇති නම් ප්‍රධාන විපක්ෂය ඒ ගැන විධිමත් මැදිහත්වීමක් කරන්නේදැයි ඇසූ පැනයට පාර්ලිමේන්තුවේත් මාධ්‍ය හමුවලදීත් ඒ ගැන පවසා ඇතැයි කී හෙතෙම ඉදිරියේදී ජාත්‍යන්තරයට ද ඒ ගැන කරුණු කියන්නේ යැයි වැඩිදුරටත් සඳහන් කර ඇත.
