ජනප්රිය ඉන්දීය රංගන ශිල්පිනී රශ්මිකා මන්දනාගේ මුහුණ යොදා ගනිමින් නිර්මාණය කරන ලද ව්යාජ වීඩියෝ පටයක් මේ දින වල සමාජ මාධ්ය තුළ මහත් ආන්දෝලනයක් මතු කර තිබෙනවා.
මෙහි මුල් වීඩියෝව සාරා පටෙල් නම් බ්රිතාන්ය-ඉන්දීය ජාතික කාන්තාවක් සිය ඉන්ස්ටග්රෑම් සමාජ මාධ්ය ගිණුම ඔස්සේ පළ කර ඇති අතර ඇය විදුලි සෝපානයකට ගොඩ වෙන අයුරු එහි දැක්වෙනවා.
ඩීප් ෆේක් තාක්ෂණය යොදාගනිමින් නිර්මාණය කර ඇති මෙම වීඩියෝ පටය හේතුවෙන් තමා බියට පත්ව ඇති බව රශ්මිකා මන්දනා සිය X ගිණුමෙහි සටහනක් තබමින් පවසා තිබුණා.
ඇය එහිදී වැඩිදුරටත් සඳහන් කර ඇත්තේ ඇයට පමණක් නොව, තාක්ෂණය අවභාවිත කිරීම හේතුවෙන් වින්දිතයින් බවට පත්වෙන සෑම කෙනෙකුටම මෙය බියජනක අත්දැකීමක් බවයි.
“කාන්තාවක් වශයෙන් මෙන්ම රංගන ශිල්පිනියක් වශයෙනුත් මෙවැනි අවස්ථාවක මට ආරක්ෂාව සහ සහයෝගය ලබා දෙන මගේ පවුලේ අයට, යහළුවන්ට සහ හිතවතුන්ට මම ස්තූතිවන්ත වෙනවා. කෙසේවෙතත් පාසලේ හෝ විශ්ව විද්යාලයේ ඉන්න කාලේ මෙවැනි දෙයක් සිදු වුණා නම් මම එයට කොහොම මුහුණ දෙයිද කියලා අවංකවම මට හිතා ගන්න බැහැ. මේ විදියට අපේ අනන්යතාව අවභාවිත කිරීම තුළින් බොහෝ දෙනෙක් පීඩාවට පත් වෙන්න කලින් සමාජයක් විදියට කඩිනමින් මේ වගේ දේවල්වලට විරුද්ධව පියවර ගැනීම වැදගත්..” යනුවෙන් ඇය එම සටහනෙන් පෙන්වා දී තිබෙනවා.
මේ අතර, මෙවැනි ව්යාජ වීඩියෝ පට නිර්මාණය කිරීමට එරෙහිව නීතිමය පියවර ගත යුතු බව ප්රවීණ බොලිවුඩ් රංගන ශිල්පී අමිතාබ් බච්චන් පවසනවා.
සාරා පටෙල් නම් බ්රිතාන්ය-ඉන්දීය ජාතික කාන්තාවක් සිය ඉන්ස්ටග්රෑම් සමාජ මාධ්ය ගිණුම ඔස්සේ පළ කළ වීඩියෝවකට රශ්මිකා මන්දනා ගේ මුහුණ යොදා සැකසු වීඩියෝවක් පසුගිය දිනවල දී සමාජ මාධ්ය ඔස්සේ සංසරණය වීමට පටන් ගෙන තිබූ අතර ඊට විරෝධය පළ කරමින් ඔහු මේ බව සිය X ගිණුමෙහි සටහන් කර තිබෙනවා.
මීට අමතරව රශ්මිකා මන්දනාට සිදුවූ මෙම සිදුවීමට විරෝධය පළ කරමින් ඉන්දීය සිනමා තරු රැසක් සිය X ගිණුම්වල හා ඉන්ස්ටග්රෑම් ගිණුම්වල සටහන් තබා තිබුණා.
