සෞඛ්‍ය අංශවලින් අනුමැතිය ලද වහාම පාසල් විවෘත කිරීමට සූදානම් යැයි අධ්‍යාපන අමාත්‍යාංශයේ ලේකම් මහාචාර්ය කපිල පෙරේරා මහතා පවසනවා.
මීට අදාලව දැනටමත් පළාත් අධ්‍යාපන අධ්‍යක්ෂවරුන් සමඟ සාකච්ඡා අරඹා ඇති බවත් මේ සාකච්ඡා වට වලින් පසුව පාසල් විවෘත කිරීම පිළිබඳව නිසි සැලැස්මක් අධ්‍යාපන අමාත්‍යවරයාට ඉදිරිපත් කිරීමට බලාපොරොත්තු වන බවත් ඔහු පවසනවා.
එමෙන්ම, පසුගිය කාලයේදී කොරෝනා වසංගතය මධ්‍යයේ පාසල් විවෘත කිරීමට යොදාගත් ක්‍රමවේදයද මේ දිනවල සමාලෝචනය කෙරෙන බවයි ඔහු පැවසුවේ.
මේ වන විට කොවිඩ් මර්දන එන්නතේ පළමු මාත්‍රාව ගුරුවරුන්ගෙන් 88% කට පමණ ලබාදී අවසන් බවත් කෑගල්ල, අම්පාර, පුත්තලම ,වව්නියාව යන ප්‍රදේශවල ගුරුවරුන්ට දෙවෙනි එන්නත් මාත්‍රාව ලබාදීමට මේදිනවල කටයුතු කරගෙන යන බවත් මහාචාර්ය කපිල පෙරේරා මහතා පවසනවා.
