කුකුළු මස් මිල අඩුකිරීමට පියවර ගැනීමට සාකච්ඡා සිදුවන බව ජාතික සත්ව නිෂ්පාදකයින්ගේ සංගමය පවසනවා.
කුකුළු මස් කිළෝග්‍රෑමයක මිල රුපියල් 1080ක් දක්වා අඩු කිරිමට හැකිවනු ඇති බවයි එම සංගමයේ කැඳවුම්කරු සුජීව ධම්මික සඳහන් කරන්නේ.
එළඹෙන උත්සවය සමයේ කුකුළු මස් ඉල්ලුම ඉහළ යාම පිළිබඳ අවධානය යොමු කරමින් මෙම පියවර ගත් බවත් එමෙන්ම, බිත්තර මිල ද පහළ දැමීමට කටයුතු කරන බවත් ජාතික සත්ව නිෂ්පාදකයින්ගේ සංගමය වැඩිදුරටත් පවසනවා.
මෙහිදී වැඩිදුරටත් අදහස් දැක්වූ ජාතික සත්ව නිෂ්පාදකයින්ගේ සංගමයේ කැඳවුම්කරු සුජීව ධම්මික,
“ඊයේ තීරණයක් අරගෙන තියෙනවා කුකුළු මස් මිල 1080ක් දක්වා අඩුකරන්න, තාම සාකච්ඡා මට්ටමේ තියෙනවා මොකද උත්සව සාමය සඳහා විශේෂයෙන්ම පාරිභෝගිකන් කුකුළු මස් වගේ දේවල් වැඩිපුර මිලදී ගන්නවා ඒ වගේම අපට යම් හෝඩුවාවක් ඇවිල්ලා තියෙනවා මේ වෙලාවේ අපේ කර්මාන්ත කරුවා අපහසුතාවයට පත්කරන්න විදේශවලින් පවා කුකුළු මස් ගෙන්වන්න තීරණයක් අරන් තියෙනවා කියලා සත්ව ආහාර සඳහා අපිට අධික මිලක් වැය වෙනවා. ඉන්ධන මිල ක්‍රමයෙන් පහළ වැටීමත් එක්ක අපිත් තීරණයක් ගත්තා යම්කිසි මට්ටමකින් හෝ පාරිභෝගිකයාට සහනයක් දෙන්න. ඒ වගේම බිත්තර මිලත් යම්කිසි ප්‍රමාණයකින් හරි පහළදමන්න මහා පරිමාණ ගොවිපොළ හිමියන් සමඟ අපි කතාකරමින් ඉන්නවා. “
