අහිතකර බැක්ටීරියා වර්ග අන්තර්ගත බව නැවත නැවතත් තහවුරු වූ චීන පොහොර තොගය සම්බන්ධව අදාල චීන සමාගම වන චින්දාවෝ සීවින් බයෝ ටෙක් සමූහයේ නියෝජ්‍ය සාමාන්‍යාධිකාරී සහ ප්‍රධාන තාක්ෂණික නිලධාරිනිය වන ඇනා සොන්ග් මහත්මිය සහ ගනුදෙනුවට අදාළ පාර්ශව කිහිපයක් ඊයේ (08) කෘෂිකර්ම අමාත්‍යංශයට කැඳවා තිබුණා.
එහිදී මාධ්‍ය විසින් විමසූ ප්‍රශ්න වලට ඇය පිළිතුරු දීමට උත්සාහ කළත් තානාපති කාර්යාලයේ නිලධාරීන් ඒ සඳහා ඇයට අවස්ථාව ලබා දී නැහැ.
කෘෂිකර්ම අමාත්‍යාංශයේදී පැවති මෙම සාකච්ඡාවට රජයේ පොහොර සමාගම්වල සභාපතිවරුන් සහ කෘෂිකර්ම අමාත්‍යාංශයේ නිලධාරීන් ද සහභාගී වී තිබෙනවා.
සාකච්ඡාව අවසානයේ චීන තානාපති කාර්යාලයේ සහ චීන සමාගමේ නියෝජිතවරු අදහස් දැක්වීම ප්‍රතික්ෂේප කරමින් එම ස්ථානයෙන් පිටව ගියා.
සාකච්ඡාවෙන් අනතුරුව මාධ්‍ය වෙත අදහස් දැක්වූ කෘෂිකර්ම අමාත්‍ය මහින්දානන්ද අලුත්ගමගේ මහතා,
“චීන තානාපතිතුමා මගෙ අමාත්‍යාංශයට එනවයි කිව්වාම මම එතුමාට එන්න දුන්නා. අපි එතුමාට අවස්ථාව දුන්නා එතුමාත් එක්ක සුහද සාකච්ඡාවක් කරන්න. පොහොර ප්‍රශ්නය සම්බන්ධයෙන් අපේ මතය අපි එතුමාට පැහැදිලි කළා. අධිකරණයේ මේ පිළිබඳ නඩුවක් තියෙනවා, ඒ නඩුව තියෙන නිසා මට මේ පිළිබඳ මගේ මතයක් ප්‍රකාශ කරන්න බෑ”
