හක්මණ ප්‍රාදේශීය සභාවේ ශ්‍රී ලංකා පොදුජන පෙරමුණ නියෝජනය කරන පමෝදා රත්නායක මන්ත්‍රීවරියට අයත් හෝටලයකට මත්පැන් බලපත්‍රයක් නිකුත්කිරීම සම්බන්ධයෙන් හක්මණ-කෝංගල ප්‍රදේශවාසීන් විසින් අද (18) පෙරවරුවේ විරෝධතාවයක නිරතවිය. ඒ කෝංගල – විජය මාවත අවහිර කරමින්.
විරෝධතාවයට එක්වූ ජනතාව ප්‍රකාශ කලේ,
”කෝංගල කියන්නෙ අහිංසක දුප්පත් මිනිස්සු ඉන්න ගමක්. මේ ගමේ මිනිස්සු ජීවත් වෙන්නෙ කුලී වැඩ කරල. කලින් අපේ මිනිස්සු බොන්න ඕන උනත් දුරට යන්න වෙන නිසා බිව්වෙ නෑ. ඒ සල්ලි වලින් අපි කාලා බීලා ඇඳල සතුටින් හිටියා.
දැන් අපේ ගම මැදට තැබෑරුමක් ඇවිත්. අපේ මිනිස්සු දුක් මහන්සියෙන් හම්බ කරන තුට්ටු දෙක තැබෑරුම් කාරයට පූජා කරල ගෙදර මිනිස්සු බඩගින්නෙ ඉන්න වෙලා. මේ හරහා වෙන්න පුලුවන් සමාජ විරෝධී ක්‍රියා වලට මන්ත්‍රීතුමිය වග කියනවද?”
මේ පිළිබඳ වැඩිදුරටත් අදහස් දැක්වූ හක්මණ ප්‍රාදේශීය සභාවේ ජනතා විමුක්ති පෙරමුණේ මන්ත්‍රී පී.ඒ. ශාන්ත මහතා,
”දැන් ආණ්ඩුවෙන් ප්‍රාදේශීය ලේකම් කොට්ඨාශයකට බාර් පර්මිට් 3ක් 4ක් දෙන්න පටන් අරන්. මේ පැත්තට සංචාරකයො වත් එනව නම් හිතන්න තිබුණ මේක සංචාරකයන්ට අරක්කු විකුණන්න ඕන නිසා දුන්න කියල.
එහෙමත් නැති නිසා අනිවාර්යයෙන් මේ අපේ ගම්වල ඉන්න අහිංසක මිනිස්සුන්ගෙ තුට්ටු දෙක හූරන් කන්න කරපු වැඩක්. මේ අහිංසක මිනිස්සුන්ව හූරන් කන්න හදන ව්‍යාපෘතියට අපේ ගමේ, කොට්ඨාශයේ මන්ත්‍රීවරුත් සම්බන්ධවෙලා.”
අප සිදුකල විමසීමේදී දැනගන්නට ලැබුණේ මෙම බලපත්‍රය ලබාදීම සම්බන්ධයෙන් හක්මණ ශාසනාරක්ෂක බලමණ්ඩලයද ඒකමතිකව විරෝධය පලකර ඇති බවයි.
