ඇමෙරිකානු ඩොලරය සමග අනෙකුත් මුදල් ඒකකවලට සාපේක්ෂව ඉන්දීය රුපියල තවමත් ඉතා හොඳින් රඳවාගෙන ඇති බව ඉන්දීය මුදල් අමාත්‍ය නිර්මලා සීතාරාමන් පවසයි.
අනෙකුත් මුදල් ඒකක තරම් උච්චාවචනයට හෝ අස්ථාවරත්වයට පත් නොවූ ඕනෑම මුදල් ඒකකයක් වේ නම් එය ඉන්දියානු රුපියල බවත්, ඉන්දියාව එය ඉතා හොඳින් රඳවාගෙන සිටින බවත් ඇය පවසා ඇත.
ඉන්දීය මහ බැංකුව සහ එරට රජය වත්මන් වර්ධනයන් පිළිබඳව ඉතා සමීපව නිරීක්ෂණය කරන බව ද ඇය පවසා තිබේ.
මුදල් අමාත්‍යවරියගේ මෙම ප්‍රකාශය සිදුවූයේ ඇමරිකානු මුදල් ඒකකයට සාපේක්ෂව රුපියල පහත වැටීමකට ලක්වීමත් සමඟ ය.
පසුගිය සිකුරාදා, ඉන්දියානු රුපියල ඩොලරයට සාපේක්ෂව 81.09 ක් ලෙස සටහන් වූයේ අවම වශයෙන් ශත 30 කින් පහත වැටීමත් සමගයි.
බ්‍රහස්පතින්දා, එය ශත 83 කින් පහත වැටී තිබුණි.
රුසියාව විසින් යුක්රේනය ආක්‍රමණය කිරීම නිසා ඇති වූ භූදේශපාලනික සිදුවීම් හේතුවෙන් ලොව පුරා වත්මන් මුදල් අවප්‍රමාණය වෙමින් පවතී.
