2022 ආසියානු ක්‍රීඩා උළෙලට සුදුස්සන් තේරීම සඳහා පැවති දෙවැනි ජාතික මලල ක්‍රීඩා තේරීම් තරගාවලිය පසුගිය බ්‍රහස්පතින්දා (10) සහ සිකුරාදා (11) දියගම මහින්ද රාජපක්ෂ ක්‍රීඩාංගණයේ දී පැවැත්වුණා.
දියගම ක්‍රීඩාංගණය නවීකරණය කිරීමෙන් පසුව පැවති පළමු තරගාවලිය මෙය වූ අතර අලුත් ධාවන පථයක් සහ ක්‍රීඩාංගණයේ පැවති සුළං තත්වය නිසාවෙන් සිය උපරිම දස්කම් දැක්වීමට ක්‍රීඩක ක්‍රීඩිකාවන්ට හැකියාවක් ලැබුණේ නැහැ.
නමුත් මෙම තරගාවලියේ දී එක් ජාතික වාර්තාවක් සහ කනිෂ්ඨ වාර්තා දෙකක් බිඳ වැටුණු අතර තවත් ක්‍රීඩක ක්‍රීඩිකාවන් කිහිප දෙනෙක් ලෝක කනිෂ්ඨ මලල ක්‍රීඩා ශූරතාවයේ පරිසාධන මට්ටම් ඉක්මවා යෑමට සමත් වීම විශේෂත්වයක්.
දෙවැනි තේරීම් තරගාවලියේ වාර්තා වූ පළමු සහ එකම ජාතික වාර්තාව පිහිටුවීමට සමත් වුනේ සචිනි පෙරේරායි.
කාන්තා රිටි පැනීම ඉසව්වේ ජාතික වාර්තාවට හිමිකම් කියන සචිනි මෙම තරගයේ දී මීටර් 3.70ක දස්කමක් පෙන්නුම් කරමින් බිඳ හෙලුවේ ඇය විසින්ම පසුගිය මාසයේ දී මීටර් 3.65ක දස්කමක් දක්වමින් පිහිටුවා තිබූ වාර්තාවයි.
කාන්තා රිටි පැනීම ඉසව්වේ දිගු කාලීන ජාතික ශූරිය වන ඇය අවසන් වරට සහභාගී වූ තරගාවලි සියල්ලේ දී ම සිය ජාතික වාර්තාව අලුත් කිරීමට සමත් වීම විශේෂත්වයක්..
සනත් ගුණරත්න මහතා යටතේ පුහුණුවීම් ලබන රිටි පැනීමේ ක්‍රීඩක සංයුතියේ ක්‍රීඩිකාවක වන සචිනි තරගවලට සහභාගි වන්නේ යුද හමුදාව නියෝජනය කරමින් ය.
