බිලියනපතියන් 100 කට වැඩි ගණනක, ලෝක නායකයින් 30 දෙනෙකු සහ රාජ්‍ය නිලධාරීන් 300කගේ රහස් අක්වෙරළ ගනුදෙනු සහ මිලියන ගණනක සැඟවුනු වත්කම් පිළිබඳව ඉතිහාසයේ කාන්දු වූ විශාලතම ලිපි ලේඛන ප්‍රමාණය ලෙස සැලකෙන ‘පැන්ඩෝරා පත්‍රිකා’ වල ජනප්‍රිය ඉන්දීය ක්‍රිකට් තරුවක් වන සචින් තෙන්දුල්කාර්ගේ මූල්‍ය ක්‍රියාකාරකම් පිළිබඳවද සඳහන්ව ඇති බව The Indian Express වාර්තා කරයි.
ඔහු, ඔහුගේ බිරිඳ වන අංජලී තෙන්ඩුල්කාර් සහ මාමණ්ඩිය වන ආනන්ද් මෙහ්තා කොටස්කරුවන් සහ අධ්‍යක්ෂවරුන් වන බ්රිතාන්ය වර්ජින් දූපත් හි පිහිටුවාගත් Saas International Limited සමාගම පිළිබඳව කරුණු මෙලෙස හෙළිවී ඇත.
එම සමාගම පිළිබඳව පැන්ඩෝරා වාර්තාවල පළමු සඳහන 2007 දක්වා පසුපසට දිවෙන අතර වඩාත් සවිස්තරාත්මක ලේඛන සමූහය සහ සමාගමේ අයිතිකරුවන් සඳහා වූ මූල්‍ය ප්‍රතිලාභ පිළිබඳ තොරතුරු ලැබෙන්නේ 2016 ජූලි මාසයේදී සමාගම විසුරුවා හැරීමෙන් පසුවයි.
සමාගම විසුරුවා හැරීමේදී එහි කොටස් ලැයිස්තුගත වටිනාකමට අනුව කොටස් හිමියන් විසින් ආපසු ලබා ගන්නා ලද්දේ පහත පරිදිය:
· සචින් තෙන්ඩුල්කාර් (කොටස් 9): ඩොලර් 856,702
· අංජලී තෙන්ඩුල්කාර් (කොටස් 14): ඩොලර් 1,375,714
· ආනන්ද් මෙහ්තා (කොටස් 5) ඩොලර් 453,082
මේ අනුව, සාස් ඉන්ටර්නැෂනල් ලිමිටඩ් හි කොටස් වල සාමාන්‍ය ආපසු ගැනීමේ මිල ඩොලර් 96,000 ක් පමණ වේ.
එමෙන්ම, පැන්ඩෝරා පත්‍රිකා වැනිම හෙළිදරව්වක් වූ ‘පැනමා ලේඛන’ හෙළිදරව්වෙන් මාස තුනකට පසුව සාස් ඉන්ටර්නැෂනල් ලිමිටඩ් දියකර හැරීම විශේෂ වේ. මෙහිදී සමාගමේ ස්වේච්ඡා විසුරුවා හැරීමේ නිලධාරියා ලෙස පැනමා ජාතික ජෝන් බී ෆොස්ටර් පත් කරන ලදී.
