අද (17) රාත්‍රියේ දෙරණ නාලිකාවේ ‘360’ විශේෂ වැඩසටහනට සහභාගී වීමට නියමිතව සිටි සමගි ජන සන්ධානයේ ජනාධිපති ධුර අපේක්ෂක සජිත් ප්‍රේමදාස මහතා එම වැඩසටහනට සහභාගී නොවන බවට තොරතුරු වාර්තා වනවා.
සජීවී වැඩසටහනක් ලෙසින් එම දේශපාලන වැඩසටහන විකාශයවීමට නියමිතව තිබුණා.
සජිත් ප්‍රේමදාස මහතා ඊයේ දිනයේ හිරු ටීවී සලකුණ වැඩසටහනට සහභාගී වී සිටියත් එය සමාජ මාධ්‍ය ඔස්සේ දැඩි දෝෂදර්ශනයට ලක්ව තිබුණා.
ඒ මෙතෙක් කලක් සජීවී වැඩසටහනක් ලෙසට විකාශය වූ හිරු සලකුණ වැඩසටහන ඊයේ දිනයේ පමණක් පෙර පටිගත කරන ලද වැඩසටහනක් ලෙසට විකාශය වීමයි.
වෙනදා වැඩසටහනට සහභාගීවන ආරාධිතයාට පිළිතුරුදීමටවත් අවස්ථාවක් නොලැබෙන ආකාරයෙන් ප්‍රශ්න අසන චමුදිත සමරවික්‍රම ඇතුළු අනෙකුත් නිවේදකයන් දෙදෙනා ඊයේ ඉතාමත් සංයමයකින් කටයුතු කරන ආකාරය ප්‍රේක්ෂකයන්ද මවිත කිරීමට සමත්වූවා.
කෙසේවෙතත් අද දිනයේ දෙරණ 360 වැඩසටහනට සජිත් ප්‍රේමදාස මහතා වෙනුවට ජනාධිපතිවරණයට ඉදිරිපත්ව සිටින තවත් අපේක්ෂකයන් කිහිපදෙනෙකුගේ පක්ෂ නියෝජනය වන අයුරින් ඔවුන්ගේ නියෝජිතයන් කිහිපදෙනෙකු සහභාගී කරගනිමින් වෙනත් දේශපාලන වැඩසටහනක් විකාශනය කෙරෙන බවත් වාර්තා වනවා.
ඒ සඳහා එක්සත් ජාතික පක්ෂය නියෝජනය කරමින් හිටපු අමාත්‍ය මනූෂ නානායක්කාර ,ශ්‍රී ලංකා පොදුජන පෙරමුණ නියෝජනය කරමින් ඩබ්ලිව් ඩී වීරසිංහ , සමගි ජන බලවේගය නියෝජනය කරමින් අජිත් මාන්නප්පෙරුම, ජාතික ජනබලවේගය නියෝජනය කරමින් වෛද්‍ය නලින්ද ජයතිස්ස සහ සර්ව ජනබලය නියෝජනය කරමින් ගෙවිදු කුමාරතුංග යන මහත්වරු සහභාගී වනවා.
සජිත් ප්‍රේමදාස මහතා ඔහුගේ දේශපාලන දිවිය තුළ කිසිදු සජීවී දේශපාලන සංවාදයකට සහභාගී නොමැතිවීමද විශේෂත්වයක්.
