මහජන ආරක්ෂක අමාත්‍ය සරත් වීරසේකර මහතා ගුරුවර්ජනය සම්බන්ධයෙන් ඊයේ (17) දිනයේදී ආන්දෝලනාත්මක ප්‍රකාශයක් සිදු කළා.
ගුරුවර්ජනය සම්බන්ධයෙන් අදහස් දැක්වීමට පෙර තිස් අවුරුදු යුද්ධය සිහිපත් කළ ඔහු පවසා සිටියේ ත්‍රස්තවාදයට මුල් වූ කරුණු සාධාරණ වුවත් අසාධාරණ වුවත් එයින් සාමාන්‍ය ජනතාවට හිරිහැර වූ නිසා එය විනාශ කළ බවයි.
ඉන් අනතුරුව ගුරුවර්ජනය සම්බන්ධයෙන් අදහස් දක්වමින් අමාත්‍යවරයා පවසා සිටියේ ගුරු වර්ජනයට හේතුව සාධාරණ විය හැකි වුවත් එයින් දරුවන්ට අසාධාරණයක් වන බවයි.
“ඒ නිසා, මේ වර්ජනයට සහභාගී වන අයට මම ඉතාම ආදරයෙන් කියන්නේ මේ එක්කෙනෙක්ගෙ දෙන්නෙක්ගෙ බලපෑමට වර්ජනය කරන්න එපා. මොකද ඒක දරුවන්ගේ අධ්‍යාපනය කඩාකප්පල් කිරීමක් නිසා. ඒ වගේම මේක මෙහෙයවන දෙන්නාටත් බරපතල චෝදනා තියෙනවා” යැයි ඔහු වැඩිදුරටත් පවසා සිටියා.
එමෙන්ම, වර්ජනයට සහභාගී නොවන ගුරුවරයන්ට තර්ජන එල්ලවන බවට තමන් අපරාධ පරීක්ෂණ දෙපාර්තුමේන්තුවට දැන්වූ බවත් අමාත්‍යවරයා පවසනවා.
මීට පෙරද, ගුරු විරෝධතාවලදී වයස්ගත ගුරුවරුන් සහ භික්ෂූන්ව කොවිඩ් සෞඛ්‍ය මාර්ගෝපදේශ කඩකරමින් පොලිසිය මගින් බලහත්කාරයෙන් ඔසවාගෙන යාම සම්බන්ධයෙන් අමාත්‍යවරයාට චෝදනා එල්ල වූ අතර ඊයේ දිනයේදී රජයේම මන්ත්‍රීවරයෙක්ද අමාත්‍යවරයාව මේ සම්බන්ධයෙන් විවේචනය කර සිටියා.
