කොටහේන දැරිය මියයා‍මේ සිදුවීම සම්බන්ධයෙන් අදාළ දෙමව්පියන් තමන් හමුවට නොපැමිණි බවට පවසන කාන්තා හා ළමා කටයුතු අමාත්‍ය සරෝජා සාවිත්‍රි පෝල්රාජ් මහත්මිය උද්දච්චකමකින් පෙළෙන බව ලංකා ගුරු සංගමයේ ප්‍රධාන ලේකම් ජෝශප් ස්ටාලින් මහතා පවසනවා.
අද (09) පැවති මාධ්‍ය හමුවකට එක්වෙමින් ඔහු සඳහන් කළේ, කවුරුන් කාවවත් හමුවීමට යාමේ අවශ්‍යතාවයක් නොමැති බවත්, ළමයින් සම්බන්ධ ගැටලුවකදී එක් ස්ථානයකට පැමිණිලි කළ පසු එය ප්‍රමාණවත් වන බවයි.
ඒ සම්බන්ධයෙන් පැමිණිල්ල කළේ අධිකරණ වෛද්‍ය නිලධාරීවරයාට බවද ඔහු එහිදී කියා සිටියා.
එම පැමිණිල්ල යොමුකළ යුතුව තිබුණේ අදාළ පාසලේ විදුහල්පතිවරිය විසින් බවට පවසමින් ජෝසෆ් ස්ටාලින් මහතා කියා සිටියේ එය ඇය විසින් සිදු නොකළ බවත් ඇය සිදු කළේ මෙම සිද්ධිය වැසීමට කටයුතු කිරීම බවයි.
ඊයේ (08) දිනයේ තමා ජනාධිපති මහජන සම්බන්ධතා අධ්‍යක්ෂ ජනරාල්වරයා හමුවූ අවස්ථාවේදී, චෝදනාවට ලක්වන අදාළ පුද්ගලයා ජාතික ජන බලවේගයේ අපේක්ෂකයෙක් හා සංවිධායකවරයෙක් බවට ඔවුන්ට පෙන්වාදුන් බව ඔහු පෙන්වාදෙනවා.
එහිදී දේශපාලන මැදිහත්වීමක් සිදු නොකරන බවට අධ්‍යක්ෂ ජනරාල්වරයා සහතික වූ බව ජෝශප් ස්ටාලින් මහතා වැඩිදුරටත් ප්‍රකාශ කළා.
