ජ්‍යේෂ්ඨ පොලිස් නිලධාරීන් පිරිසක් අද පෙරවරුවේ සියම් මහ නිකායේ අස්ගිරි පාර්ශවයේ නායක අතිපූජ්‍ය වරකාගොඩ ශ්‍රී ඥානරතන මහ නා හිමියන් බැහැදුටුවා.
මෙම අවස්ථාවට බස්නාහිර පළාත භාර ජ්‍යේෂ්ඨ නියෝජ්‍ය පොලිස්පති දේශබන්දු තෙන්නකෝන් ඇතුළු ජ්‍යේෂ්ඨ පොලිස් නිලධාරීන් පිරිසක් සහභාගී වුණා.
මෙහිදී අස්ගිරි නාහිමියන් වෙත අදහස් දක්වමින් ඔවුන් කියා සිටියේ බුද්ධි තොරතුරු සම්බන්ධයෙන් ගතයුතු නිශ්චිත ක්‍රියාමාර්ගයක් පිළිබඳව රජයවත්, එවකට පැවති රජයවත් ආරක්ෂක අමාත්‍යංශය විසින්වත් පැහැදිළි උපදෙසක් පොලිස් නිලධාරීන්ට ලබාදි නොතිබූ බවයි.
යුද්ධයෙන් පසුව සාමකාමී වාතාවරනයක් යටතේ සංහිදියාව නැමති තේමාවක් යටතේ එවකට රජය කටයුතු කළ බවයි ඔවුන් පෙන්වා දෙන්නේ.
විශේෂයෙන් මුස්ලිම් ප්‍රජාව සමඟ සමීපව කටයුතු කළ නිසා අයි.එස්.අයි.එස් ත්‍රස්තවාදීන් සම්බන්ධවත් ගැඹුරින් කටයුතු නොකළ බවත් ඒ හේතුවෙන් 300ක පමණ අසරණ ජීවිත අහිමිවූ බවත් ඔවුන් පවසනවා.
එම ප්‍රදේශවල සේවය කළ නිසාවෙන්ම පොලිස් නිලධාරීන්ට එරෙහිව විමර්ශන අරඹන ලෙස ජනාධිපති කොමිෂන් සභාව විසින් නියෝග ගෙන ඇති බවත් එලෙස විමර්ශනයක් සිදුවන විට ඔවුන්ට විශ්‍රාම වැටුපද අහිමිවීමේ ගැටලුවකට මුහුණ දී ඇති බවත් ඔවුන් අස්ගිරි නායක හිමියන්ට පෙන්වා දෙනවා.
එබැවින් මේ සම්බන්ධයෙන් මැදිහත්වීමක් කරන ලෙසයි ඔවුන් අස්ගිරි හිමියන්ගෙන් ඉල්ලා සිටින්නේ.
ඉන්පසුව. මාධ්‍යවෙත අදහස් දක්වමින් මොණරාගල කොට්ඨාශයභාර ජ්‍යේෂ්ඨ පොලිස් අධිකාරී සිසිල කුමාර හේරත් මහතා පවසා සිටියේ රාජකාරිය කිරීම වරදක් වීම හේතුවෙන් රැකියාව අහිමිවීමේ හෝ සිරදඬුවම් ලැබීමේ අවදානමක සිටින බැවින් ඒ සම්බන්ධයෙන් මහ නා හිමියන්ට සහ දළඳා වහන්සේට කණ්ණලව් කිරීමට මෙලෙස පැමිණි බවයි.
