නිදහස් චතුරස්රය අසල පිහිටි ‘ඉන්ඩිපෙන්ඩන්ස් ආකේඩ්’ කිසිසේත් ව්යාපාරික ස්ථානයකට සුදුසු ස්ථානයක් නොවන බවත්, එය පසුගිය කාලයේදී දිගින් දිගටම පාඩු ලබමින් තිබූ බවත් පාර්ලිමේන්තු මන්ත්රී පාඨලී චම්පික රණවක මහතා පවසනවා.
පාඩු ලබමින් තිබියදී වුවත් එය පවත්වාගෙන යාමට පසුගිය රජය කටයුතු කළේ සාමාන්ය ජනතාවට නිදහසේ හැසිරීමට, විවාහ මංගල්ය උත්සව ගන්නා තරුණ තරුණියන්ට ඡායාරූප ගැනීමට අවස්ථාව ලබාදීමට බවත් පාඨලී චම්පික රණවක මහතා පෙන්වා දෙනවා.
කෙසේ නමුත් වත්මන් රජය විසින් එම ස්ථානය පෞද්ගලික සමාගමකට බදුදීමට තීරණය කර ඇති බවයි මන්ත්රීවරයා අද (02) විපක්ෂ නායක කාර්යාලයේ පැවති මාධ්ය හමුවට සහභාගිවෙමින් සඳහන් කළේ.
මෙම ස්ථානය කොළඹ 07 ප්රදේශයේ පිහටි අක්කර 05 හමාරකින් සමන්විත භූමියක් බවත්, එම ප්රදේශයේ පර්චර් එකක වටිනාකම කෝටි එකහමාරක් වන බවත් ඔහු පවසනවා. මෙම ඉඩම පර්චර් 800 කින් සමන්විත වන බවද මන්ත්රීවරයා සඳහන් කරයි.
එම ඉඩමේ පිහිටි ගොඩනැගිල්ල වර්ග අඩි 90,000 කින් සමන්විත වේ. අදාල ඉඩම සහ ගොඩනැගිල්ල රුපියල් බිලියන 25 කට වැඩි වටිනාකමකින් යුක්ත බව පෙන්වා දෙන චම්පික රණවක මහතා පවසන්නේ එය වසර 10 ක කාලයක් සඳහා රුපියල් බිලියන 1.2 කට බදුදීමට රජය තීරණය කර ඇති බවයි.
ආණ්ඩුවට සම්බන්ධ ව්යාපාරිකයන් හතර පස් දෙනෙකු අතර ආණ්ඩුවේ සම්පත් බෙදා ගැනීමේ වැඩපිළිවෙලක් දියත් වන බවත් මෙම ගනුදෙනුව එහි එක් පියවරක් පමණක් බවත් චම්පික රණවක මහතා පවසයි.