ජනාධිපති ගෝඨාභය රාජපක්ෂ මහතාට විරෝධය පලකරමින් මිරිහානේදී පැවති විරෝධතාවය ආවරණය කිරීමට එහි ගිය
මාධ්‍යවේදීන් කිහිප දෙනෙක්ම ආරක්ෂක අංශවල සහ පොලිසියේ පහරදීම්වලින් දැඩි තුවාල ලබා තිබෙනවා.
පහරකෑමට ලක්වූ එක් මාධ්‍යවේදියෙක් පොලිස් අත්අඩංගුවට ගෙන ඇති අතර තවත් මාධ්‍යවේදීන් කිහිපදෙනෙක් ප්‍රතිකාර සඳහා රෝහල් ගතකර තිබෙනවා.
සිදුවීම වන අවස්ථාවේදී විදෙස් මාධ්‍යවේදීන් ඇතුලු මාධ්‍යවේදීන් රැසක් එම ස්ථානයට පැමිණ සිටි අතර ඔවුන් එම සිදුවීම රූගතකරමින් සිටින අතරවාරයේ පොලීසියේ සහ ආරක්ෂක අංශවල පහරදීම්වලට ලක්ව තිබුණා.
පහරදීමෙන් තුවාල ලැබූ ප්‍රාදේශීය මාධ්‍යවේදී නිශ්ශංක වේරපිටිය තුවාල ලබා මේ වනවිට ජාතික රෝහලේ ප්‍රතිකාර ලබනවා.
මේ අතර එම අවස්ථාවේදී එම සිදුවීම රූගත කරමින් සිටි මාධ්‍යවේදී සුමේධ සංජීව පොලිස් අත්අඩංගුවට පත්වූ අතර ඔහු පොලිස් පහරදීම්වලින් තුවාල ලබා තිබෙනවා.
ඔහුව මේ වන විට අධිකරණයට ඉදිරිපත් කිරීම සඳහා රැගෙන ගොස් ඇති බවයි වාර්තා වන්නේ.
මේ අතර ප්‍රාදේශීය මාධ්‍යවේදී ප්‍රදීප් වික්‍රමසිංහද පොලිස් පහරකෑම්වලට ලක්ව තුවාල ලබා තිබුණා.
