මුදල් හා ප්රාග්ධන වෙළෙඳපළ සහ රාජ්ය ව්යවසාය ප්රතිසංස්කරණ රාජ්ය අමාත්ය අජිත් නිවාඩ් කබ්රාල් මහතා මහ බැංකු අධිපති ධූරයේ වැඩ භාර ගැනීම සඳහා සිය පාර්ලිමේන්තු මන්ත්රී ධූරයෙන් ඉවත් වුවහොත් ඒ සඳහා පත්වේ යැයි නම් කිහිපයක්ම මේ වන විට දේශපාලන ආරංචිමාර්ග වලින් කියැවෙනවා.
ඒ අනුව වත්මන් මුදල් අමාත්ය බැසිල් රාජපක්ෂ මහතාට පාර්ලිමේන්තුවට පිවිසීම සඳහා මන්ත්රී ධූරය පුදදුන් ජයන්ත කැටගොඩ මහතා යළිත් පාර්ලිමේන්තු මන්ත්රීවරයෙකු ලෙස ශ්රී ලංකා පොදුජන පෙරමුණ පත්කරනු ඇති බවට තොරතුරු වාර්තා වනවා.
මේ අතර බොදුබල සේනා සංවිධානයේ මහලේකම් හා අපේ ජනබල පක්ෂයේ සාමාජික පූජ්ය ගලගොඩ ඥාණසාර හිමියන්ගේ නමද ඒ අතර කියැවෙනවා.
නිමාවූ මැතිවරණයේදී අපේ ජනබල පක්ෂයට එක් මන්ත්රී ආසනයක් හිමිවූ අතර එ් සඳහා පූජ්ය ගලගොඩඅත්තේ ඥාණසාර හිමි හා අතුරලියේ රතන හිමි අතර මත ගැටුමක්ද ඇතිවුණා.
කෙසේ වෙතත් යම් කිසි කාලයකින් අනතුරුව එම මන්ත්රී ධූරය ගලගොඩඅත්තේ ඥාණසාර හිමියන්ට ලබාදීමට වූ එකඟතාවය මත පූජ්ය අතුරලියේ රතන හිමි පාර්ලිමේන්තුවට පිවිසියද තවමත් එම මන්ත්රී ධූරය ඥාණසාර හිමියන්ට ලබාදීමට කටයුතු කළේ නැහැ.
එමෙන්ම පසුගියදා ප්රවෘත්ති සාකච්ඡාවක් පවත්වමින් පූජ්ය ගලගොඩඅත්තේ ඥාණසාර හිමියන්, ආණ්ඩුව දැඩිව විවේචනය කළ කාදිනල් හිමියන් හට දැඩි වාග් ප්රහාර එල්ල කිරීමද විශේෂත්වයක්.
මේ අතර අජිත් නිවාඩ් කබ්රාල් මහතාගෙන් හිස්වන මන්ත්රී ධූරය සඳහා අග්රාමාත්ය මහින්ද රාජපක්ෂ මහතාගේ දෙටු පුත් යෝෂිත රාජපක්ෂ මහතාගේ නමද කියැවෙනවා.
යෝෂිත රාජපක්ෂ මහතා මේ වන විට ක්රියාකාරී දේශපාලනයේ නිරතව සිටින අතර ඔහු අග්රාමාත්ය කාර්ය මණ්ඩලයේ ප්රධානියා ලෙසඳ කටයුතු කරනවා.