ෂැංහයි නගරය කොරෝනා වෛරස පාලනයට අගුලු දැමීම හේතුවෙන් චීනයේ නැව් තැනීමේ සැලසුම් මන්දගාමී කර ඇති අතර මේ හේතුවෙන් එරට තුන්වන ගුවන් යානා ප්‍රවාහන නෞකාව දියත් කිරීම ප්‍රමාද වී ඇති බවට වාර්තා පළවී තිබේ.
චීන නාවික හමුදාව විසින් අප්‍රේල් 23 වන දින එරට නාවික හමුදාවේ 73 වන සංවත්සරයට සමගාමීව නව ගුවන් යානා භාරක නෞකාව දියත් කිරීමට සැළසුම් කර තිබිණ.
එහෙත් ෂැංහයි හි පැතිර යන කොවිඩ් වසංගතය පාලනයට පනවා ඇති සංචරණ සීමා නිසා ඇතැම් අමුද්‍රව්‍ය ප්‍රවාහනය ප්‍රමාද කර ඇති බැවින් සැලැසුම් ප්‍රමාද වී ඇති බව වාර්තා වේ.
මෙම නෞකාවේ ඉදිකිරීම් 2017 වසරේ සිට ෂැංහයි හි Changxing Island හි Jiangnan නැව් තටාකයේ සිදු වෙමින් පවතින අතර මෙම වසර මුලදී එය දියත් කිරීමට සැලසුම් කර තිබිණ.
මෑත කාලීන චන්ද්‍රිකා ඡායාරූප මගින් පෙන්නුම් කළේ මීටර් 320කට ආසන්න දිග නෞකාවේ ඉදිකිරීම් බොහෝ දුරට අවසන් වී ඇති බවයි.
එහෙත් නව තත්වය හමුවේ එය දියත් කිරීම බොහෝ සෙයින් ප්‍රමාද වනු ඇති බව එරට වාර්තා වැඩිදුරටත් පවසයි.
