අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ (විශ්‍රාමික) ජ්‍යෙෂ්ඨ පොලිස් අධිකාරී ශානි අබේසේකර මහතා නීතිපති, පොලිස්පති සී.ඩී.වික්‍රමරත්න, බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන්, සහකාර පොලිස් අධිකාරී නෙවිල් සිල්වා සහ පොලිස් පරීක්ෂක ජගත් නිශාන්තට එරෙහිව රුපියල් බිලියනයක වන්දි මුදලක් ඉල්ලමින් එන්තරවාසියක් යොමු කර තිබෙනවා.
ශානි අබේසේකර මහතා සිය නීතීඥ මංජුල බාලසූරිය මහතා මාර්ගයෙන් 2023 ඔක්තෝබර් 18 දින යොමු කරන ලද මෙම ලිපියෙන් පෙන්වා දෙන්නේ අදාළ වග උත්තරකරුවන් ශානි අබේසේකර මහතාට එරෙහිව ද්වේශසහගත ලෙස නීතිමය ක්‍රියාමාර්ග ගෙන අධිකරණයේ ක්‍රියාදාමය අවභාවිත කර ඇති බවයි.
මෙම ලිපියේ තවදුරටත් සඳහන් වන්නේ කොළඹ අපරාධ කොට්ඨාශය (CCD), විශේෂයෙන් එහි පොලිස් පරීක්ෂකවරුන් වන ජගත් නිශාන්ත සහ නෙවිල් සිල්වා යන අය පැහැදිලි ද්වේෂ සහගත චේතනාවෙන් අබේසේකරගේ ගෞරවයට හානි කිරීමට උත්සාහ ගෙන ඇති අතර එම හැසිරීම අධිකරණයේ ක්‍රියාවලිය අවභාවිත කිරීමක් බවයි.
2013 වසරේදී කොළඹ ප්‍රදේශයේ මොහොමඩ් සියාම් නම් ව්‍යාපාරිකයෙකු පැහැරගෙන ගොස් ඝාතනය කිරීම සම්බන්ධයෙන් හිටපු නියෝජ්‍ය පොලිස්පති වාස් ගුණවර්ධන ඇතුළු 6 දෙනෙකු වැරදිකරුවන් කරමින් ඔවුන්ට කොළඹ මහාධිකරණය විසින් මරණ දඬුවම නියම කරනු ලැබුවා.
මෙම ඝාතන සිද්ධියට අදාළ නඩුවේදී හිටපු නියෝජ්‍ය පොලිස්පති වාස් ගුණවර්ධන ඇතුළු පිරිසට එරෙහිව ව්‍යාජ සාක්ෂි සැකසූ බවට චෝදනා කරමින්, අපරාධ පරීක්ෂණ දෙපාර්තමේන්තුවේ එම විමර්ශන භාරව කටයුතු කළ ශානි අබේසේකරට එරෙහිව අපරාධ පරීක්ෂණ දෙපාර්තමේන්තුවට සහ කොළඹ අපරාධ කොට්ඨාශයට 2020 වසරේදී පැමිණිල්ලක් ගොනු කෙරුණා.
ඒ අනුව 2020 වසරේ ජුලි මස 31 වෙනිදා අදාළ පැමිණිල්ල සම්බන්ධයෙන් කොළඹ අපරාධ කොට්ඨාශය විසින් එවකට වැඩ තහනම්ව සිටි අපරාධ පරීක්ෂණ පාර්තමේන්තුවේ හිටපු අධ්‍යක්ෂ පොලිස් අධිකාරී ශානි අබේසේකර අත්අඩංගුවට ගනු ලැබූ අතර ව්‍යාජ සාක්ෂි සැකසීම සම්බන්ධයෙන් එල්ල වූ චෝදනා හේතුවෙන් මාස 10යි දින 8ක් ඔහු රක්ෂිත බන්ධනාගාරගත කර තිබුණා.
