අද පෙරවරු 06 න් අවසන් වූ පැය 24 තුළ වාර්තා වූ වෙඩි තැබීම්වලින් තුවාල ලැබූ පුද්ගලයින් සිව් දෙනෙකු ජීවිතක්ෂයට පත්ව තිබෙනවා.
ඒ අනුව රත්මලාන – සිල්වා මාවතේ පිහිටි නිවසක ඊයේ (27) රාත්‍රියේ වෙඩි තබා පුද්ගලයෙකු ඝාතනය කර ඇති බව පොලීසිය පවසනවා.
ඝාතනයට ලක්වූ පුද්ගලයාගේ නිවසට නාඳුනන තුවක්කුකරුවන් දෙදෙනෙකු ඇතුළු වී ඔහුට වෙඩි තබා ඇති අතර පසුව ඔවුන් ප්‍රදේශයෙන් පලා ගොස් ඇති බවයි වාර්තා වන්නේ.
රත්මලාන ප්‍රදේශයේ පදිංචි 30 හැවිරිදි මෙම පුද්ගලයා දකුණු කොළඹ ශික්ෂණ රෝහලට ඇතුළත් කිරීමෙන් අනතුරුව මියගොස් තිබෙනවා.
ඝාතනය සඳහාT56 ගිනි අවියක් භාවිත කර ඇති අතර ඝාතනයට හේතුව කුමක්දැයි මෙතෙක් අනාවරණය වී නොමැති බව පොලීසිය සඳහන් කරනවා.
මේ අතර ගම්පහ මහේස්ත‍්‍රාත් අධිකරණය ඉදිරිපිට ඊයේ (27) සිදුවූ වෙඩි තැබීමකින් තුවාල ලබා සිටි පාතාල කල්ලි නායක සමන් රෝහිත හෙවත් ‘පස් පොඩ්ඩා’ මියගොස් තිබෙනවා.
නඩුවක් සම්බන්ධයෙන් අධිකරණයට පැමිණ සිටි පස් පොඩ්ඩා ඇතුළු තිදෙනෙකුට වාහනයකින් පැමිණි නාඳුනන තුවක්කුකරුවන් වෙඩි තබා පළා ගොස් ඇති බව පොලීසිය සදහන් කරනවා.
මීට අමතරව අම්බලන්ගොඩ – ගලගොඩ ප්‍රදේශයේ අවමංගල්‍ය උත්සවයකදී ඊයේ පස්වරුවේ සිදුවූ වෙඩි තැබීමකින් පුද්ගලයින් දෙදෙනෙකු ජීවිතක්ෂයට පත්වුණා.
වෙඩි තැබීමෙන් එක් පුද්ගලයෙකු එම ස්ථානයේම මියගොස් සිටි අතර අනෙක් පුද්ගලයා තුවාල ලබා රෝහල් ගත කෙරුණා.
පසුව ඔහු රෝහලට ඇතුළත් කිරීමෙන් අනතුරුව ජීවිතක්ෂයට පත්වූ බවයි වාර්තා වන්නේ.
