චීනය සමග පවතින වෙළෙඳ යුද්ධය සම්බන්ධයෙන් එකඟතාවකට එළැඹීම පිළිබඳව අමෙරිකානු ජනාධිපති ඩොනල්ඩ් ට්‍රම්ප් ඉඟි පළකර තිබෙනවා.
ඔහු පවසා ඇත්තේ චීන ආනයන මත පනවන බදු ඉහළ නැංවීමට කටයුතු නොකරන බවයි.
මේ අතර එරට ප්‍රවෘත්ති සාකච්ඡාවකදී මාධ්‍යවේදියෙකු ට්‍රම්ප්ගෙන් කළ ප්‍රශ්න කිරීමක් පිළිබඳවද විදෙස් මාධ්‍ය වාර්තාකර තිබුණා.
එහිදී මාධ්‍යවේදියා “ජනාධිපති ෂී ජින්පින් ඔබ සමග සෘජුව කතා කළා ද?” යනුවෙන් විමසා සිටි අවස්ථාවේදී ඊට පිළිතුරු ලෙස ජනාධිපති ට්‍රම්ප් “එය එතරම් වැදගත් නැහැ. අපි චීනය සමග එකඟතාවකට එළැඹෙන බව මම විශ්වාස කරනවා” යනුවෙන් පවසා තිබෙනවා.
අමෙරිකාව විසින් පසුගියදා චීන ආනයන මත පැනවු තීරු බද්ද 104%කින්ද පසුව 145%ක් ලෙස ඉහළ දමනු ලැබුවාට පසු අමෙරිකානු භාණ්ඩ සඳහා චීනය පනවා තිබූ තීරු බද්ද අද 125% දක්වා ඉහළ දමනු ලැබුවා.
පසුව අමෙරිකාව විසින් නැවතත් චීන භාණ්ඩ සඳහා පැන වූ සමස්ත තීරුබදු ප්‍රතිශතය 245%ක් ලෙස මේ වන විට ඉහළ දමා තිබෙනවා.
