වත්මන් ආණ්ඩුවට විරෝධය පළකරමින් හෙට පස්වරු 04 ට කොළඹ කොටුව දුම්රියපළ ඉදිරිපිට විරෝධතාවක් පැවැත්වීමට සමගි ජනබලවේගය තීරණය කර තිබෙනවා.
සියලු දේශපාලන නායකයින්ද මේ සදහා එක්විය යුතු බවයි අද විපක්ෂනායක කාර්යාලයේ පැවති මාධ්‍ය හමුවට එක්වෙමින් පාර්ලිමේන්තු මන්ත්‍රී රාජිත සේනාරත්න කියා සිටියේ.
මෙම මාධ්‍ය හමුවට පාර්ලිමේන්තු මන්ත්‍රී මුජුබර් රහුමාන් මහතාද එක්වුණා.
පාලකයින් ගෙන ඇති වැරදි තීන්දු තීරණ හේතුවෙන් ජනතාවට පීඩාවට පත්වීමට සිදුව ඇති බවයි එහිදී ඔහු සදහන් කළේ.
මේ අතර, කොටුව ජනාධිපති මන්දිරයට ඇතුළුවන මාර්ගයක් අවහිර කිරීම සම්බන්ධයෙන් සමගි ජන බලවේගයේ පාර්ලිමේන්තු මන්ත්‍රී හිරුණිකා ප්‍රේමචන්ද්‍ර ඊයේ (28) දින සිය විරෝධය පළ කළා.
මෙලෙස මාර්ග අවහිර කිරීමට කිසිඳු අවසරයක් පොලීසියට නොමැති බවයි පාර්ලිමේන්තු මන්ත්‍රී හිරුණිකා ප්‍රේමචන්ද්‍ර එහිදී පෙන්වා දුන්නේ.
ජනතා මේ අවස්ථාවේ එක්ව අවදිවිය යුතු බවත් මේ අවස්ථාවේ ජනතාව විඳින පීඩාව වෙනුවෙන් සියලුම දෙනා එක්විය යුතු බවත් ඇය වැඩිදුරටත් සඳහන් කර සිටියා
