විපක්ෂය විසින් ඉදිරිපත් කරන ලද විශ්වාසභංග යෝජනාව ප්‍රමාණවත් පදනමක නොමැති බැවින් ශ්‍රීලංකා නිදහස් පක්ෂයේ පාර්ලිමේන්තු කණ්ඩායම ඊට සහය නොදක්වන බව හිටපු ජනාධිපති, වත්මන් පාර්ලිමේන්තු මන්ත්‍රී මෛත්‍රීපාල සිරිසේන මහතා පවසනවා.
විශ්වාසභංගයක ඇතුලත් වියයුතු කරුණු මෙහි ඇතුලත් නොවන බවත් එහි විධිමත්භාවයක් නොමැති බවත් පෙන්වා දෙන හිටපු ජනාධිපතිවරයා වැඩිදුරටත් පවසන්නේ බරපතල මූල්‍ය අක්‍රමිකතාවයක් හෝ අපරාධයක් වැනි කරුණකට අමාත්‍යවරයා සම්බන්ධ වූයේ නම් විශ්වාසභංගය පිළිබඳව සලකා බැලිය හැකිවනු ඇති බවයි.
එමෙන්ම, දිගුකාලීන ජාතික ප්‍රතිපත්ති සහ සැලසුම් වල වටිනාකම පැහැදිලි කරමින් ඒ මහතා පෙන්වා දෙන්නේ රජයන් මාරුවීමේදී නිලධාරීන් සහ සැලසුම් මරුවන ක්‍රමය වහාම නතර කළ යුතු බවයි.
එමෙන්ම, රජයක් බලයට පත්වී පළමු වසර දෙක තුල සිය ප්‍රතිපත්ති ප්‍රකාශනයේ ඇතුලත් සියල්ල ඉටු කළ නොහැකි බවත් ඊට ප්‍රමාණවත් කාලයක් ලබාදිය යුතුබවත් ඔහු අවධාරණය කර සිටිනවා.
