ශ්‍රී ලංකා ටෙලිකොම් ආයතනයෙන් සේවා සපයන SLT Peo TV සේවාව දිවයිනේ ප්‍රදේශ රැසක බිදවැටී තිබෙනවා.
ඒ අනුව බොහෝ පාරිභෝගිකයන් හට එම සේවාව ලබාගත නොහැකි අතර ඇතැම් පාරිභෝගියන් හට පෙර විකාශය වූ වැඩසටහන් යළි නැරඔීමේ (TV Rewind) පහසුකම අක්‍රීයව ගොස් තිබෙනවා.
එමෙන්ම දුරකතන සහ අන්තර්ජාල දෝෂ වාර්තා කිරීම සදහා ශ්‍රී ලංකා ටෙලිකොම් ආයතනය ලබාදී ඇති 1212 අංකයද මේ වන විට ක්‍රියාවිරහිතව පවතිනවා.
තවද ශ්‍රී ලංකා ටෙලිකොම් නිල ෆේස්බුක් පිටුවේ හා Peo TV ෆේස්බුක් පිටුවේ මැසෙන්ජර් පහසුකමද මේ වන විට අක්‍රීය කර තිබෙනවා.
මේ සියලු කරුණු හේතුවෙන් ටෙලිකොම් පාරිභෝගිකයන් දැඩිලෙස අපහසුතාවයට පත්ව සිටින බවට විවිධ ප්‍රදේශවලින් තොරතුරු වාර්තා වනවා.
මේ සම්බන්දයෙන් ශ්‍රී ලංකා ටෙලිකොම් ආයතනය කිසිදු ප්‍රකාශයක් නිකුත්කර නොමැති අතර සමාජ මාධ්‍ය තුළ ශ්‍රී ලංකා ටෙලිකොම් ආයතනය දැඩිලෙස විවේචනයට ලක්කර ඇති අයුරුද දක්නට ලැබෙනවා.
විදෙස් රටවල අන්තර්ජාල සේවා බිදවැටුණු විට ඒ සම්බන්දයෙන් නිල නිවේදනයක් නිකුත් කර පාරිභෝගිකයන්ගෙන් සමාව ඉල්ලීමට කටයුතු කරන අතර අදාල කාලය තුළ සිය පාරිභෝගියන් හට සිදුවූ අපහසුතාවයට අදාලව මුදලක් සිය මාසික බිල්පතෙන් අඩුකිරීමක් සිදුකිරීමට කටයුතු කරනවා.
නමුත් මෙරට අන්තර්ජාල සේවා සපයන ආයතන පිළිබදව බොහෝ පාරිභෝගියන්ගේ ඇත්තේ විවේචන පමණි.
මේ වන විට Peo TV නිල ෆේස්බුක් පිටුවේ අදාල සිදුවීම සම්බන්දයෙන් නිවේදනයක් පලකර තිබුනද පාරිභෝගියන් එම නිවේදනය දැඩි ලෙස විවේචනය කර තිබෙන අයුරු දක්නට ලැබෙනවා.
අදාල නිවේදනයේ සිය ක්ෂණික දුරකතන ඇමතුම් අංකය වන 1212 අංකය අක්‍රීයව පවතින්නේ මන්දැයි හේතු දක්වා නොමැතිවීමද විශේෂත්වයක්.
එමෙන්ම තවදුරටත් PEO TV ෆේස්බුක් පිටුවේද මැසෙන්ජර් පහසුකම අත්හිටුවා තිබෙනවා.
