බස්නාහිර පළාත් සෞඛ්ය සේවා අධ්යක්ෂ කාර්යාලය යටතේ රෝහල් සහ සෞඛ්ය සේවා ආයතන යටතේ සේවය කරන ඇතැම් වෛද්යවරුන්ට මාස 9ක වැනි කාලයක් පුරාවට වැටුප් ගෙවා නැතැයි රජයේ වෛද්ය නිලධාරීන්ගේ සංගමය ප්රකාශ කරනවා.
පළාතට අනුමත වෛද්ය නිලධාරීන් සංඛ්යාව ඉක්මවා ඇති බැවින් අමතර වෛද්යවරුන්ට වැටුප් ගෙවීමට නොහැකි යැයි ආණ්ඩුකාරවරයා සහ ප්රධාන ලේකම්වරයා විසින් සඳහන් කර ඇති බව එම සංගමය විසින් නිකුත් කළ නිවේදනයක සඳහන්.
එහෙත් එම වෛද්යවරුන් පළාතේ සෞඛ්ය සේවාවන් පුළුල් කිරීමට සාපේක්ෂව රාජ්යසේවා කොමිසමේ පත්වීම් ලද පිරිසක් බවයි එම සංගමය පෙන්වා දෙන්නේ.
ඔවුන් අනතුරු හඟවන්නේ ඉදිරි සති කිහිපය තුල මෙම තත්වය නිවැරදි කිරීමට අපොහොසත් වුවහොත් බස්නාහිර පළාත් සභාවට වෛද්යවරුන් අනියුක්ත කිරීමේ ක්රියාවලියට සහය නොදැක්වීමට සිදුවනු ඇති බවයි.
මාස ගණනාවක් පුරාවට දිග්ගැස්සෙමින් පවතින මෙම ගැටළුව පිළිබඳව මීට කලකට පෙර අදහස් දක්වමින් බස්නාහිර පළාත් සෞඛ්ය සේවා අධ්යක්ෂ කාර්යාලය පවසා සිටියේ බස්නාහිර පළාතේ අනුමත විශේෂඥ වෛද්යවරුන්ගේ සංඛ්යාව 189ක් වුවද මේ වනවිට විශේෂඥ වෛද්යවරු සහ වැඩබලන විශේෂඥ වෛද්යවරුන් 235 දෙනකු සේවය කරනු ලබන බවත් මේ හේතුවෙන් අනුමත සේවක සංඛ්යාව ඉක්මවා බස්නාහිර පළාතේ විශේෂඥ වෛද්යවරු 45දෙනකු සිටින බැවින් කළමනාකරණ සේවා චක්රලේඛ 03/2018 අනුව වැටුප් ගෙවීමේ හැකියාවක් නොමැති නමුත් පළාත් සභාවෙන් මෙම වැටුප් ගෙවන ලෙසට මධ්යම ආණ්ඩුවෙන් දැනුම්දී ඇති බවයි.
ඉන්පසු එම මුදල පළාත් සභාවට මධ්යම ආණ්ඩුවෙන් ප්රතිපූර්ණය කරන බවටද දැනුම්දී ඇති බවත් ඒ අනුව මේ වනවිට අදාළ වැටුප් ගෙවීම සම්බන්ධව අවශ්ය වැඩ කටයුතු සියයට 99ක ප්රමාණයක් කර අවසන් බවත් එම කාර්යාලය විසින් කලකට පෙර දැනුම් දුන් නමුත් මේ වනතෙක් එම ගැටළුව විසඳී නොමැති බවයි රජයේ වෛද්ය නිලධාරීන්ගේ සංගමය පෙන්වා දෙන්නේ.