හිත රිදෙන යමක් සිදුවූයේ නම් තමන් ඊට සමාව අයැදින බව ජනාධිපති ගෝඨාභය රාජපක්ෂ මහතා රනිල් වික්‍රමසිංහ මහතාට අද (23) දින ප්‍රකාශ කර සිටියා.
ඒ, ජනාධිපතිවරයා විසින් අද දින කැඳවූ සර්ව පාක්ෂික සමුළුව රැස් වූ අවස්ථාවේදීයි.
රනිල් වික්‍රමසිංහ මහතාට පෙර සමුළුව ඇමතූ මහබැංකු අධිපති අජිත් නිවාඩ් කබ්රාල් මහතා විසින් වත්මන් අර්බුදයේ වරද මීට පෙර පැවති රජය පිට පැටවීමට විරෝධය පළ කරමින් රනිල් වික්‍රමසිංහ මහතා අදහස් දැක්වූ අතර ඔහු එහිදී පවසා සිටියේ මෙම අවස්ථාවට තමන් සහභාගී වූයේ පටු දේශපාලනය පසෙක ලා බවයි.
වරද සම්බන්ධයෙන් අතීතයට යන්නේ නම් විජය රජුගේ කාලයටම යා යුතු වන බවත් පක්ෂ දේශපාලනයෙන් තොරව තමා පැමිණි ගමනෙන් අනතුරුව අද දින සහභාගී නොවූ විපක්ෂයේ දේශපාලන කොටස් සමඟ සාකච්ඡා කොට ඔවුනුත් මීට සම්බන්ධ කරගැනීම තම අරමුණ බවත් රනිල් වික්‍රමසිංහ මහතා එහිදී පවසා සිටියා.
ඉන් අනතුරුව අදහස් දක්වමින් ජනාධිපතිවරයා පවසා සිටියේ මහබැංකු අධිපති අජිත් නිවාඩ් කබ්රාල් මහතා වෙනුවෙන් තමන් සමාව ඉල්ලා සිටින බවයි.
