2023 ලෝක කුසලාන තරඟාවලිය සඳහා සහභාගී වන ශ්‍රී ලංකා සංචිතය සහ කාර්ය මණ්ඩලය සඳහා අනුමැතිය ලබා ගැනීමේදී ඒ සඳහා පවතින නිවැරදි ක්‍රියා පටිපාටිය අනුගමනය කිරීමට අපොහොසත් වීම සම්බන්ධයෙන් ක්‍රීඩා අමාත්‍යාංශය විසින් ක්‍රිකට් පරිපාලනයට මෙන්ම ශ්‍රී ලංකා ක්‍රිකට් ආයතනයට (SLC) චෝදනා නඟනවා.
මේ සම්බන්ධයෙන් නිවේදනයක් නිකුත් කරමින් ක්‍රීඩා අමාත්‍යාංශය පවසන්නේ ශ්‍රී ලංකා කණ්ඩායම තරඟය සඳහා පිටත්ව යාමට දින 21කට පෙර සංචිතයේ සහ කාර්ය මණ්ඩලයේ අනුමැතිය සඳහා ඉල්ලීමක් ශ්‍රී ලංකා ක්‍රිකට් ආයතනයට එවිය යුතු බවයි.
කෙසේවෙතත්, ශ්‍රී ලංකා ක්‍රිකට් ආයතනයේ ලේකම් මොහාන් ද සිල්වා මහතාගේ අත්සනින් අනුමැතිය ඉල්ලා සැප්තැම්බර් 20 වැනි දින යොමු කරන ලද ලිපියක් සැප්තැම්බර් 21 වැනිදා ක්‍රීඩා සංවර්ධන දෙපාර්තමේන්තුවට ලැබුණු බව එම නිවේදනයේ සඳහන්.
සිකුරාද දින (21) එම ලිපිය ලැබීමෙන් අනතුරුව සෙනසුරාදා සහ ඉරිදා යෙදී ඇති නිවාඩු දිනද නොසලකා ජාතික ක්‍රීඩා සභාවේ අනුමැතිය ද, ක්‍රීඩා සංවර්ධන දෙපාර්තමේන්තුවේ අනුමැතිය ද සහිතව 2023.09.25 සදුදා දින පස්වරුවේ අමාත්‍යාංශ ලේකම් වෙත ලිපි ගොණුව භාර දීමට කටයුතු කර ඇති බව ක්‍රීඩා අමත්‍යංශය පෙන්වා දෙනවා.
අමාත්‍යංශය විසින් නිකුත් කර ඇති නිවේදනයේ වැඩිදුරටත් සඳහන් වෙන්නේ ලෝක කුසලාන තරඟාවලිය සඳහා දින කිහිපයක් පමණක් තිබියදී ඒ සඳහා අනුමැතිය ඉල්ලීම හේතුවෙන් තරඟාවලිය සඳහා සුදුසු කණ්ඩායමක් තේරීමට ක්‍රීඩා අමාත්‍යාංශයට නොහැකි වී ඇති බවයි.
ලෝක කුසලාන තරඟාවලිය සඳහා සහභාගී වීමට නියමිත ශ්‍රී ලංකා සංචිතය අනුමත කිරීමේ ක්‍රියාවලිය ප්‍රමාද කිරීම සම්බන්ධයෙන් පුද්ගලයන් කිහිප දෙනෙක් සමාජ මාධ්‍ය ඔස්සේ ක්‍රීඩා අමාත්‍යංශයට චෝදනා කිරීම හේතුවෙන් අමාත්‍යංශය මෙම නිවේදනය නිකුත් කර තිබෙනවා.
