ඊයේ මධ්‍යම රාත්‍රියේ සිට රටතුළ අත්‍යවශ්‍ය සේවා පමණක් ක්‍රියාත්මක කිරීමට ඊයේ පස්වරුවේ පැවති කැබිනට් මණ්ඩල රැස්වීමේදී තීරණය කරන ලදි.
ඒ අනුව, සෞඛ්‍ය, ප්‍රවාහන, ආරක්ෂක සේවා, කෘෂිකාර්මික කටයුතු ඇතුළු සේවා පමණක් ක්‍රියාත්මක වන අතර මෙම තීරණය ජුලි මස 10 වැනිදා දක්වා බලපැවැත්වේ.
කැබිනට් රැස්වීමෙන් පසුව මාධ්‍ය වෙත අදහස් දැක්වූ අමාත්‍ය හරීන් ප්‍රනාන්දු මහතා සඳහන් කළේ මෙය කිසිසේත්ම රට වසාදැමීමක් නොවන බවයි. රට වසාදැමීමට තරම් අර්බුදයක් රටතුළ නොමැති බවත්, දැනට රටතුළ තිබෙන සීමිත ඉන්ධන තොග ආරක්ෂා කර ගැනීමේ අරමුණින් මෙම තීරණයට එළඹි බවත් ඔහු සඳහන් කරනවා.
එසේම මෙවැනි පියවරක් අනුගමනය කරන්නේ, ජුලි 10 වැනිදා සිට රට සාමාන්‍ය පරිදි පවත්වාගෙන යාමේ පෙර සූදානමක් ලෙස බවත් ජනතාව ඔවුන් ජීවත් වන ප්‍රදේශ තුළම රඳවා ගැනීම මේ හරහා සිදුවන බවත් ජනතාවට අවශ්‍ය ආහාර ද්‍රව්‍ය, ඖෂධ ලඟම ඇති වෙළඳසලෙන්, ෆාමසියෙන් මිලදී ගතහැකි බවත් හරීන් ප්‍රනාන්දු මහතා වැඩිදුරටත් සඳහන් කරනවා.
“රටක් හැටියට අපි මේ මොහොතේ විශාල කැපකිරීම් රාශියක් කරපු කණ්ඩායමක්. රටක් විදියට අපි විශ්වාස කරනවා රාජ්‍ය අංශයත් පෞද්ගලික අංශයත් සහයෝගය ලබාදෙයි කියලා. විශේෂයෙන්ම මේකට හේතුව පසුගිය දවස්වල අපි ඇණවුම් කළ ඉන්ධන තොග සීමිත වීම සම්බන්ධයෙන් රටේ උද්ගතවෙලා තියෙන ව්‍යාකූල තත්වය. ඒ නිසා අපි මූලික වශයෙන්ම කල්පනා කරන්නෙ ජුලි 10 වනදායින් පස්සේ මේ රට සාමාන්‍ය ලෙස පත්වාගෙන යන්නට අවශ්‍ය ඉන්ධන සියලු දේ මේ දවස් කිහිපයේදී එක්‍ රැස්කර ගැනීම සහ ඒවා අවශ්‍ය විදියට බෙදාහැරීමේ කළමනාකාරීත්වය කරන්න.
අත්‍යාවශ්‍ය සේවා කිව්වාම ආහාර පාන බෙදාහැරීම්, අන්තර්වාර ප්‍රවාහනය, සෞඛ්‍ය ක්ෂේත්‍රයට අවශ්‍ය සියලු ඉන්ධන ලබාදීම, ඒ වගේම ගුවන්යානාවලටත් සංචාරකයින්ටත් අවශ්‍ය කටයුතු ඒ අයුරින්ම සැපයෙනවා. ඒ වගේම යම්කිසි කෙනෙක් වරදවා තේරුම් ගන්න එපා, මේක ලොක්ඩවුන් එකක් නෙවෙයි. මේක හැබැයි නිවසේ සිට වැඩකිරීමක් ජුලි 10 වෙනිදා වෙනකල්. ඒ නිසා අපට අවශ්‍ය වෙන්නේ ඒ පළාතේ රැඳීම තමයි. ඒ පළාතේ රැඳීම තුළදී තමන්ගෙ බඩුගන්න තියෙන කඩ, ෆාමසි ඒ සියලු දේවල් සාමාන්‍ය පරිදි සිදුවෙනවා”
