ශ්‍රී ලංකා – නවසීලන්ත අවසන් ටෙස්ට් තරඟය අද

ශ්‍රී ලංකා – නවසීලන්ත ටෙස්ට් ක්‍රිකට් තරගාවලියේ දෙවැනි සහ අවසන් තරගය අද (26) ගාල්ල ජාත්‍යන්තර ක්‍රිකට් ක්‍රීඩාංගණයේදී ආරම්භ වීමට නියමිතයි.

පළමු ටෙස්ට් තරගයෙන් සුපිරි ජයක් හිමිකර ගත් ශ්‍රී ලංකා කණ්ඩායම අදින් ඇරඹෙන මෙම තරගයට පිවිසෙන්නේ තරගාවලිය ජය ගැනීමේ අරමුණ ඇතිවයි.

මෙම තරගයට ජය ගතහොත් හෝ ජයපරාජයෙන් තොරව නිමා වුවහොත් ශ්‍රී ලංකා කණ්ඩායමට වසර 14කට පසුව නවසීලන්තයට එරෙහිව ටෙස්ට් තරගාවලි ජයග්‍රහණයක පහස විඳ ගන්නට හැකියාව ලැබෙනවා.

ආබාධයකට ලක් වු වේගපන්දු යවන ක්‍රීඩක විශ්ව ප්‍රනාන්දු වෙනුවට ශ්‍රී ලංකා සංචිතයට කැඳවුම් ලද දහ පන්දු යවන ක්‍රීඩක නිෂාන් පීරිස්ට හෙට ජගත් ටෙස්ට් ක්‍රිකට් වරම් හිමිවන බව ශ්‍රී ලංකා ක්‍රිකට් ආයතනය පවසනවා.

ඔහු ශ්‍රී ලංකාව වෙනුවෙන් ටෙස්ට් වරම් හිමිකර ගන්නා 167 වැනි ටෙස්ට් ක්‍රීඩකයා වනවා.

මීට අමතරව, මිලාන් රත්නායක ද මෙම තරගයට කැඳවා තිබෙන අතර ඒ අනුව රමේෂ් මෙන්ඩිස්ට සහ ලහිරු කුමාරට සිය ස්ථානයන් අහිමිව ගියා.

මේ අතර, ICC ටෙස්ට් පන්දුය වන්නන්ගේ ශ්‍රේණිගත කිරීම් වල නවතම යාවත්කාලින කිරීමට අනුව ස්ථාන 5ක් ඉදිරියට පැමිණි ප්‍රභාත් ජයසූරිය ටෙස්ට් පන්දු යවන්නන් අතර 8 වැනි ස්ථානයට පත්ව තිබෙනවා.

මීට අමතරව ටෙස්ට් පිතිකරුවන් අතර ස්ථාන තුනක් ඉදිරියට පැමිණි කමිඳු මෙන්ඩිස්ට එහි 16 වැනි ස්ථානයට හිමි වෙද්දී, දිමුත් කරුණාරත්න සහ ධනංජය ද සිල්වා 17 වැනි ස්ථානයේ සමතැන් ගෙන ගත්තා.