ගාල්ල වරාය සංවර්ධන ව්‍යාපෘතිය පිළිබඳව ඉදිරිපත් කළ යෝජනාවකට කැබිනට් අනුමැතිය හිමි වී තිබෙනවා.
රජය නිවේදනය කරන්නේ ‘සංචාරක ගමනාන්තය සහ සුරක්‍ෂිත වරාය’ යන තේමාව යටතේ ගාලු වරාය සංවර්ධනය කිරීමේ අවශ්‍යතාවය හඳුනාගෙන ඇති බවත් එමඟින් ගාලු වරාය කලාපීය වාණිජ වරායක් ලෙස පවත්වාගෙන යාමට හැකි වන බවත්ය.
රාජ්‍ය හා පෞද්ගලික හවුල් ව්‍යාපෘතියක් යටතේ ගාල්ල වරාය සංවර්ධන ව්‍යාපෘතිය ක්‍රියාත්මක කිරීමට වරාය හා නාවික කටයුතු අමාත්‍යාංශය සැලසුම් කර තිබෙනවා.
කෙසේ වෙතත්, මෙම ව්‍යාපෘතිය මඟින් සාම්ප්‍රදායික සේවාවන් සහ පෞද්ගලික අංශයෙන් ආයෝඡන ආකර්ෂණය කර ගැනීම සඳහා සීමා පැනවීමක් සිදු නොවන බව රජය පවසනවා.
ඒ අනුව, යෝජිත පරිදි ගාල්ල වරාය සංවර්ධන ව්‍යාපෘතිය ක්‍රියාත්මක කිරීමට අවශ්‍ය පියවර ගැනීම සඳහා වරාය හා නාවික කටයුතු අමාත්‍යවරයා ඉදිරිපත් කළ යෝජනාවට අමාත්‍ය මණ්ඩලය අනුමැතිය ලබා දී තිබෙනවා.
ව්‍යාපෘතිය පිළිබඳව අදහස් දක්වමින් කැබිනට් ප්‍රකාශක අමාත්‍ය රමේෂ් පතිරණ මහතා පවසන්නේ වරාය දැනට පවතින මීටර් 10 සිට මීටර් 18 සිට 20 දක්වා ගැඹුරු කිරීම සහ නව දිය ඇලක් තැනීමේ කටයුතු ආරම්භ කිරීමට නියමිත බවයි.
ඒ අනුව ගාල්ල වරාය සංවර්ධන ව්‍යාපෘතිය සඳහා ඩොලර් මිලියන 175 ක් පමණ වැයවනු ඇති බවට ගණන් බලා ඇතැයි අමාත්‍යවරයා වැඩිදුරටත් සඳහන් කරනවා.
