අපකීර්තිමත් ක්‍රිකට් වාර්තා මැද ලංකාව තරගාවලිය ආරම්භ කරයි

ගාල්ල ජාත්‍යන්තර ක්‍රීඩාංගණයේදී ජාතික කණ්ඩායම වාර්තා කළ අඩුම ලකුණු සංඛ්‍යාව වාර්තා කරමින් දැවී යන්නට ශ්‍රී ලංකා ක්‍රිකට් පිලට අද(14) සිදුවිය.

ඒ ශ්‍රී ලංකා එංගලන්ත ටෙස්ට් තරගාවලියේ පළමු දිනයේදී සිය පළමු ඉණිම ලකුණු 135කට සීමා කරගැනීමට සිදුවීමෙනි.

ඉන් අනතුරු පිටියට පිවිසි එංගලන්ත කණ්ඩායම දිනය අවසන් වනවිට කඩුළු 2ක් පමණක් දැවී ලකුණු 127ක් ලබාගත්තේ ශ්‍රී ලංකා පළමු ඉණිමට ලකුණු 8ක පරතරයකිනි.

ටෙස්ට් ඉණිම 50කට සහභාගී වූවන් අතර අඩුම ලකුණු ලාභියා වාර්තාව හිමි කරගැනීමට ද මෙම තරගයේදී ලහිරු තිරිමාන්න සමත් වූ අතර පිට පිට සිව් වැනි වතාවට ලකුණු 0ට දැවී යමින් කුසල් මෙන්ඩිස් ද ශ්‍රී ලංකා ක්‍රිකට් ලෝලීන් දැඩි කලකිරීමකට පත් කළේය.

කෙසේ වෙතත් ඇන්ජලෝ මැතිව්ස් සිය ටෙස්ට් ලකුණු 6000 සීමාවත් දිනේෂ් චන්දිමාල් 4000 සීමාවත් පසුකිරීමට අද සමත් වූ අතර කෙසේ හෝ ඉවසීමෙන් ක්‍රීඩා කර ශතකයක් ලබාගන්නා බවට අනාවැකි පළ කළ නිරෝෂන් දික්වැල්ල තම ඉණිම ලකුණු 12 කට සීමා කරගත්තේ සුපුරුදු නොවසිල්ල යළිත් ප්‍රේක්ෂකයන් හමුවේ ප්‍රදර්ශනය කරමිනි.

එංගලන්තය වෙනුවෙන් ජෝ රූට් 66ක් හා ජොනී බෙයාර්සටෝ 47 ක් වශයෙන් ලකුණු ලබාගෙන නොදැවී පන්දුවට පහර දෙති.

සංචාරයේ පළමු දිනය ගැන වාර්තා කරමින් ද ගාඩියන් වෙබ් අඩවිය සටහන් කර තිබුණේ ලංකාවේ පැත්තෙන් අපේක්ෂිත පරිදිම සියල්ල සිදු වූ බවය.