දකුණු ආසියාවේ ප්‍රමුඛතම ජාත්‍යන්තර ගුවන් සේවය ලෙස ශ්‍රි ලංකන් ගුවන් සේවය ඇගයීමකට ලක්ව තිබෙනවා.
ශ්‍රී ලංකන් ගුවන් සේවය නිවේදනය කළේ ඉන්දියාවේ බැංග්ලෝර් හි පැවති දකුණු ආසියානු සංචාරක සම්මාන උළෙලේදි මෙලෙස ඇගයීමට ලක්වූ බවයි.
එමෙන්ම ප්‍රමුඛතව ගුවන් සේවා පන්තිය ලෙස ශ්‍රී ලංකන් ගුවන් සේවාවේ ව්‍යාපාරික පන්තිය මෙහිදී ඇගයීමට ලක්ව තිබුණා.
දකුණු ආසියානු සංචාරක සම්මාන උළෙලේදී සත්කාරක හා සංචාරක ක්ෂේත්‍රවල සමාගම් ඇගයීමට ලක්කෙරෙන්නේ එහි වෘත්තිකයින්ගේ සහ පාරිභෝගිකයින්ගේ මනාප අනුවයි.
පසුගිය වසරේද මෙම සම්මාන උළේලේදී වසරේ විශිෂ්ඨම ගුවන් සේවා සම්මානය ශ්‍රී ලංකන් ගුවන් සේවය හිමිකර ගත්තා.
මේ වන විට ශ්‍රී ලංකන් ගුවන් සේවය ඉන්දියාව, මාලදිවයින, පාකිස්ථානය, බංග්ලාදේශය සහ නේපාලය ඇතුළු දකුණු ආසියානු ගමනාන්තයන් වෙත සතියකට ගුවන් ගමන් වාර 140 ක් ක්‍රියාත්මක කරනු ලබනවා.
