2022 වර්ෂයේ දෙවන කාර්තුවේ දී ශ්‍රී ලංකා ආර්ථිකයේ වර්ධන වේගය සියයට 8.4ක පසුබැසීමක් ලෙස වාර්තා වී ඇති බව 2022 වර්ෂයේ දෙවන කාර්තුව සඳහා ජාතික ගිණුම් ඇස්තමේන්තු නිකුත් කරමින් ජනලේඛන හා සංඛ්‍යාලේඛන දෙපාර්තමේන්තුව අනාවරණය කර සිටිනවා.
ඒ අනුව, 2021 වර්ෂයේ දෙවන කාර්තුවේ දී ස්ථාවර මිල (2015) ගණන් යටතේ ශ්‍රී ලංකාවේ දළ දේශීය නිෂ්පාදිතය රු. මිලියන 3,038,855 ක් ලෙස වාර්තා වූ අතර එය 2022 වර්ෂයේ දෙවන කාර්තුවේ දී රු. මිලියන 2,782,114 ක් දක්වා අඩු වී ඇත. එසේ වුවද මෙම අගය 2020 වර්ෂයේ දෙවන කාර්තුවේ ස්ථාවර මිල (2015) ගණන් යටතේ දළ දේශීය නිෂ්පාදිත වටිනාකම ලෙස වාර්තා වූ රු. මිලියන 2,612,069 ට සාපේක්ෂව ඉහළ අගයක පවතිනවා.
2022 වර්ෂයේ දෙවන කාර්තුවේ දී දළ දේශීය නිෂ්පාදිතයේ වර්ධන වේගය ඇස්තමේන්තු කෙරෙන්නේ ඊට පෙර වර්ෂයේ එනම් 2021 වර්ෂයේ දෙවන කාර්තුවේ මූර්ත දළ දේශීය නිෂ්පාදිතයේ වටිනාකමට සාපේක්ෂවයි.
