පක්ෂ ජාති ආගම් පන්ති හෝ වෙනත් භේදබින්න වීම්වලින් තොරව පලස්තීන ජනතාවට යුක්තිය සාධාරණත්වය ඉටු කිරීම වෙනුවෙන් රටක් ලෙස එකට එකතු වී ඇති බවත්, ඒ සදහා ජාත්‍යන්තරය සමග අත්වැල් බැදගෙන කටයුතු කළ යුතු බවත්, කතාවලට නිවේදනවලට සීමා නොවී පලස්තීන ජනතාවගේ ජීවත් වීමේ අයිතිය වෙනුවෙන් පෙනි සිටිය යුතු බවත් විපක්ෂ නායක සජිත් ප්‍රේමදාස මහතා පවසනවා.
ඔහු මෙම අදහස් පල කළ සිටියේ, අද කොළඹ ලක්ෂ්මන් කදිරගාමර් මධ්‍යස්ථානයේ පැවැති United Nations Day for Solidarity with Palestine People සමුළුව අමතමින්.
එසේම පලස්තීනය විනාශ කිරිමේ රාජ්‍ය ත්‍රස්තවාදයට එරෙහිව රජයත් සමග එකට නැගී සිටින අතර, එක ස්ථාවරයක සිට පලස්තීන ජනතාවගේ අයිතිය වෙනුවෙන් පෙනී සිටින බවද ඔහු සදහන් කළා.
ඔහු මෙහිදී කියා සිටියේ, ඊශ්‍රායල ප්‍රහාරවලින් විපතට පත් පලස්තීන ජනතාවට සහන දෙන විට, එම ජනතාව ජීවත්වන ස්ථානවලට බෝම්බ හෙළීම සම්බන්ධයෙන් විරුද්ධව ලෝක නායකයන් ද පෙරට ආ යුතු බවත්, කතාව පමණක් නොව ක්‍රියාවද තිබිය යුතු බවයි.
තවද, මේ ඊශ්‍රලය සහ පලස්තීනය යන රටවල් දෙක සහෝදරත්වයෙන් සංහිදියාවෙන් යුක්තව එකට එකතු වී ජීවත් වන යුගයක් වෙනුවෙන් සැවොම කැපවිය යුතු බවද ඔහු වැඩිදුරටත් සදහන් කළා.
