අද (21) උදෑසන කෑගල්ල – රංවල අලුත් පාර හංදිය ආසන්නයේ සමාගම් වතු ප්‍රතිසංස්කරණ, තේ හා රබර් ආශ්‍රිත භෝග වගා සහ කර්මාන්තශාලා නවීකරණය හා තේ හා රබර් අපනයන ප්‍රවර්ධන රාජ්‍ය අමාත්‍ය කනක හේරත් මහතා හට ගෑස් පෝලිමක රැදී සිටි පිරිසකගෙන් දැඩි විරෝධයක් එල්ල වී තිබෙනවා.
හේරත් මහතා අද උදෑසන කෑගල්ල රංවල හන්දිය පසුකරයාමේ දී ගෑස් ලබා ගැනීම සඳහා පෝලිම්වල රැඳී සිටි ජනතාව ඔහු ගමන් ගත් රථයට විරෝධය දැක්වූවා.
ඒ කෑගල්ල දිස්ත්‍රික්කයේ ලිට්‍රෝ ගෑස් බෙදාහැරීමේ ප්‍රධාන නියෝජිතයා ලෙසද රාජ්‍ය අමාත්‍ය කනක හේරත් මහතා කටයුතු කරන නිසායි.
මෙහි දී පාර්ලිමේන්තු මන්ත්‍රීවරයාගේ මෝටර් රථය එම ස්ථානයෙන් නොනවත්වා ධාවනය කිරීමට උත්සහ දරා ඇති අතර එහි දී ගෑස් පෝලිමේ රැඳී සිටි පුද්ගලයෙකු ඔහු අත තිබූ ගෑස් සිලින්ඩරයකින් එම රථයට පහර දුන් බව වාර්තා වනවා.
පසුව කනක හේරත් මහතාට විරෝධය පලකරමින් ගෑස් පෝලිමේ සිටි පිරිස ප්‍රධාන මාර්ගය හරස් කරමින් විරෝධතාවයක නිරත වුණා.
ඔවුන් සදහන් කරන්නේ කනක හේරත් මහතාට කෑගල්ල දිස්ත්‍රික්කය පුරා ගෑස් බෙදාහැරීමේ නියෝජිත ආයතන රැසක් තිබෙන බවයි.
