අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ ශානි අබේසේකර මහතාගේ ආරක්ෂාවට පොලිස් විශේෂ කාර්ය බලකායේ නිලධාරීන් යෙදවීමට සහ පෞද්ගලික පිස්තෝලයේ බලපත්‍රය නැවත ලබා දීමට ඇති හැකියාවත් සොයා බලා කරුණු වාර්තා කරන ලෙස අභියාචනාධිකරණය ඊයේ (18) නීතිපතිවරයාට දැනුම් දී තිබෙනවා.
සිය ආරක්ෂාව තහවුරු කරන්නැයි ඉල්ලා ශානි අබේසේකර මහතා ගොනු කළ රිට් පෙත්සම නිශ්ශංක බන්දුල කරුණාරත්න සහ ශෂි මහේන්ද්‍රන් යන අභියාචනාධිකරණ විනිසුරු මඩුල්ල හමුවේ නැවත සලකා බැලූ අවස්ථාවේදී මෙම නියෝගය නිකුත් කර ඇති බවයි වාර්තා වෙන්නේ.
එහිදී ශානි අබේසේකර මහතා වෙනුවෙන් පෙනීසිටි ජනාධිපති නීතීඥ උපුල් ජයසූරිය මහතා පවසා ඇත්තේ සිය සේවාදායකයාට රාජකාරි කාලය තුළ ද ජීවිතයට තර්ජන එල්ල වූ බවයි.
මේ හේතුවෙන්, ඔහුගේ ආරක්ෂාව සඳහා පොලිස් විශේෂ කාර්ය බලකායේ නිලධාරීන් යෙදවීමට කටයුතු කරන ලෙස ජනාධිපති නීතිඥවරයා ඉල්ලා තිබෙනවා.
එහිදී ජ්‍යෙෂ්ඨ අතිරේක සොලිසිටර් ජෙනරාල් රොහාන්ත අබේසූරිය මහතා ප්‍රකාශ කළේ, ශානී අබේසේකර මහතාගේ ආරක්ෂාව වෙනුවෙන් පොලිස් නිලධාරීන් 8දෙනෙකු අනියුක්ත කර ඇති බවයි.
නමුත් පොලිස් නිලධාරීන් තුනක් හෝ හතරක් පමණක් ආරක්ෂා කටයුතු සැලසීමේ කටයුතුවල නිරතව සිටින බව ශානි අබේසේකර මහතාගේ නීතිඥවරයා නැවතත් පෙන්වා දුන්නා.
මෙම පෙත්සම පෙබරවාරි 21 වැනිදා නැවත සලකා බැලීමට නියමිතයි.
