මෙවර 5 ශ්‍රේණිය ශිෂ්‍යත්ව විභාගයට අදාළව සියලු උපකාරක පන්ති, දේශන, සම්මන්ත්‍රණ සහ වැඩමුළු පැවැත්වීම අද (11) මධ්‍යම රාත්‍රියේ සිට තහනම් බව විභාග දෙපාර්තමේන්තුව පවසනවා.
විභාග කොමසාරිස් ජනරාල් අමිත් ජයසුන්දර මහතා සඳහන් කළේ, 5 ශ්‍රේණිය ශිෂ්‍යත්ව විභාගයට අදාළව අනුමාන ප්‍රශ්න ඇතුළත් ප්‍රශ්න පත්‍රය මුද්‍රණය කිරීම සහ ඒවා බෙදාහැරීම ද තහනම් වන බවයි.
ඊට අමතරව විභාග ප්‍රශ්න පත්‍රවල ප්‍රශ්න ලබාදෙන බවට හෝ ඒ හා සමාන ප්‍රශ්න ලබාදෙන බවට පෝස්ටර්, බැනර්, අත්පත්‍රිකා, විද්‍යුත්,මුද්‍රිත හෝ සමාජ මාධ්‍ය මඟින් ප්‍රසිද්ධ කිරීම සහ එවැනි දෑ ළඟ තබා ගැනීම සපුරා තහනම්.
කිසියම් තැනැත්තෙකු, ආයතනයක් හෝ පාර්ශවයක් මෙම නියෝග කඩකිරීම හෝ උල්ලංඝනය කිරීම සිදුකරන්නේනම් ඒ පිළිබඳව ළඟම ඇති පොලිස් ස්ථානය, පොලිස් මූලස්ථානය හෝ විභාග දෙපාර්තමේන්තුව වෙත පැමිණිලි කළ හැකි බව විභාග කොමසාරිස් ජනරාල්වරායා සඳහන් කරනවා.
පාසල්වලට සිසුන් තෝරාගැනීමට සහ ශිෂ්‍යාධාර ප්‍රදානය කිරීම සඳහා පැවැත්වෙන 2024 වර්ෂයට අදාළව 5 ශ්‍රේණිය ශිෂ්‍යත්ව විභාගය සැප්තැම්බර් මස 15 වන දින පැවැත්වීමට නියමිතයි.
මේ ඒ පිළිබඳ තවදුරටත් පැහැදිලි කළ විභාග කොමසාරිස් ජනරාල් අමිත් ජයසුන්දර මහතා,
“15 වෙනිදා විභාගය පැවැත්වෙනවා උදෑසන 9.30 – 12.15 දක්වා. ඒ කාලය තුළ මම විශේෂයෙන්ම ඉල්ලා සිටිනවා ජනාධිපතිවරණයට ඉදිරිපත් වන සියලු අපේක්ෂකයින්ගෙන් සහ ඒ සියලු පාර්ශවයන්ගෙන් මේ දරුවන්ගේ විභාගයට බාධාවන කිසිදු ආකාරයක ක්‍රියාකාරකමක යෙදෙන්නට එපා. විශේෂයෙන්ම ශබ්ද විකාශන යන්ත්‍ර භාවිත කරන්න එපා කියලා ඉල්ලා සිටිනවා එම කාල සීමාව තුළ…”
