ඩෑන් ප්‍රියසාද් ඝාතන සිද්ධිය සම්බන්ධයෙන් රක්ෂිත බන්ධනාගාර ගතකර සිටි සැකකරුවන් දෙදෙනෙකු කොළඹ මහේස්ත්‍රාත් අධිකරණයේ පැවති හඳුනාගැනීමේ පෙරට්ටුවේදී සාක්ෂිකරුවන් විසින් හඳුනා ගෙන තිබෙනවා.
කොළඹ අතිරේක මහේස්ත්‍රාත් හර්ෂණ කැකුණවෙල මහතාගේ නියෝගයකට අනුව හඳුනා ගැනීමේ පෙරට්ටුව ඊයේ (09) පැවැත්වුණා.
මෙහිදී, සැකකරුවන් වෙනුවෙන් පෙනී සිටි නීතිඥවරයා අධිකරණය හමුවේ ප්‍රකාශ කර ඇත්තේ, විමර්ශනය, වැරදි පාරක යන බවයි.
අත්අඩංගුවේ පසුවන සැකකරුවන් දෙදෙනාම එම සිද්ධියට කිසිසේත්ම සම්බන්ධ නොමැති බවත්, නියම වෙඩික්කරුවන් නිදැල්ලේ සිටින බවත් ඔහු පවසා තිබුණා.
නීතිඥවරයා තවදුරටත් පවසා ඇත්තේ, මෙම හඳුනා ගැනීමේ පෙරෙට්ටුව සඳහා ඉදිරිපත් කළ සාක්ෂිකරුවන් දෙදෙනෙකු දෙවන සැකකරුගේ ඥාතීන් වන බැවින් සැකකරුවන් හොඳින් හඳුනන ඥාතීන් දෙදෙනෙකු ඔහු හඳුනා ගැනීම සඳහා පෙරට්ටුවකට ඉදිරිපත් කිරීම නීත්‍යානුකූල නොවන බවයි.
කෙසේවෙතත්, එහෙත් විමර්ශන සිදුකරන බස්නාහිර පළාත් දකුණ විශේෂ විමර්ශන ඒකකයේ නිලධාරියා අධිකරණය හමුව සඳහන් කළේ, සාක්ෂිකරුවන්ගේ ප්‍රකාශ සටහන් කර ගැනීමෙන් අනතුරුව සහ CCTV දර්ශනවලින් අනාවරණය කරගත් තොරතුරු මත මෙම සැකකරුවන් අත්අඩංගුවට ගත් බවයි.
සිද්ධියට සම්බන්ධ විමර්ශන තවදුරටත් සිදුකෙරෙන බවත් එම නිලධාරියා සඳහන් කර සිටියා.
ඉන් අනතුරුව අදාළ සැකකරුවන් ලබන 23 වන දා දක්වා රක්ෂිත බන්ධනාගාර ගත කිරීමටද නියම කළා.
කොළොන්නාව ලක් සඳ සෙවන නිවාස සංකීර්ණයේ නිවසක සිටියදී යතුරු පැදියකින් පැමිණි දෙදෙනෙකු පිස්තෝල වර්ගයේ ගිනි අවියකින් ඩෑන් ප්‍රියසාද් මහතා වෙඩි තබා ඝාතනය කළේ, පසුගිය 22 වැනිදායි.
