T 20 ලෝක කුසලාන තරඟාවලිය ආරම්භ කරමින් පළමු තරඟය පැවැත්වුණේ බී කාණ්ඩයේ පැපුවා නිව්ගිනියා සහ ඕමාන කණ්ඩායම් අතරයි.
14 වන පන්දුවාරයේ හතරවන පන්දුවේදී කිසිවෙකු නොදැවී කඩුලු 10කින් තරගය ජයගත් ඕමානය ඉහළ දල ලකුණු වේගයක් සමග ප්‍රසාද ලකුණු සටහනේ පෙරමුණ ගැනීමට සමත් වුණා.
එහිදී විශිෂ්ට පිතිහරඹයක නිරත වූ ජතින්ද්‍ර සිං සහ අකීබ් ඉල්යාස් ඕමාන ජයග්‍රහණය සහතික කළා. ජතින්ද්‍ර නොදැවී ලකුණු 53ක් සහ ඉල්යාස් නොදැවී ලකුණු 50ක් ලබා ගත්තා.
තරඟයේ පළමුව පන්දුවට පහර දුන් පැපුවා නිව් ගිනියා කණ්ඩායමේ පළමු කඩුලු දෙක ලකුණු 2ක් තුල දැවී ගියා. ඉන්පසු ඉනිම ගොඩ නැංවූ Assad Vala සහ Charles Amini පැපුවා කණ්ඩායමට යම් අස්වැසිල්ලක් ලබා දුන්නා. එහිදී Vala ලකුණු 56ක් ලබා ගත්තා. පන්දුවාර 14.1ක් වන විට ලකුණු 102කට කඩුලු 3ක් පමණක් දැවී තිබුණද ඊළඟ පන්දු 20 තුල ලකුණු 16කට කඩුලු 6ක් බිඳ වැටුණා. ඒ අනුව නියමිත පන්දුවාර 20 තුළ පැපුවා නිව් ගිනියා කණ්ඩායම ලකුණු 129කට සීමා වුණා. එම ඉනිම සුනු විසුණු කළ සීෂාන් මක්සූඩ් ලකුණු 20කට කඩුලු 4ක් දවා ගත්තා.
බංග්ලාදේශය සමග පැවති බී කාණ්ඩයේ දෙවැනි තරඟය ලකුණු 6කින් ජයගැනීමට ස්කොට්ලන්තය සමත් වුණා.
තරඟයේ පළමුව පන්දුවට පහර දුන් ස්කොට්ලන්තය කඩුලු 9ක් දැවී ලකුණු 140ක් ලබා ගත්තා. එහිදී ක්‍රිස් ග්‍රීව්ස් ලකුණු 45ක් ලබා ගැනීමට සමත් වුණා. මෙහෙදි හසන් ලකුණු 19 ට කඩුලු 3ක් දවා ගත්තා.
පිළිතුරු ඉනිම ක්‍රීඩා කළ බංග්ලාදේශයට නියමිත පන්දුවාර 20 තුළ කඩුලු 7ක් දැවී ලබා ගැනීමට හැකි වුයේ ලකුණු 134ක් පමණයි. මුෂ්ෆිකර් රහීම් ලකුණු 38යි. බ්‍රැඩ් වීල් ලකුණු 24කට කඩුලු 3ක් දවා ගත්තා.
T20 ලෝක කුසලාන තරගාවලියේ ඒ කාණ්ඩයෙන් තරග වදින ශ්‍රී ලංකාව සහභාගී වන පළමු තරඟය නැම්බියාව සමග අද (ඔක් 18 සඳුදා) පැවැත්වෙනවා. නෙදර්ලන්තය සහ අයර්ලන්තය අතර තරඟයත් අද පැවැත්වීමට නියමිතයි.
