ඇෆ්ගනිස්තානයේ ආර්ථිකය යථා තත්වයට පත් කර ගැනීමේදී චීනයේ මූල්‍ය සහයෝගය මත යැපීමට බලාපොරොත්තු වන බව තලේබාන් සංවිධානය ප්‍රකාශ කර තිබේ.
තලේබාන් සංවිධානයේ ප්‍රකාශක සබිහුල්ලා මුජාහිඩ් සදහන් කර ඇත්තේ ආර්ථිකය යථා තත්වයට පත් කර ගැනීමේ ඉදිරි තලේබාන් සටනේදී චීනය තමන්ගේ ප්‍රධානතම සහකරු වන බවයි.
නව සේද මාවතක් ඇති කිරීමේ චීන වැඩපිලිවෙළට තලේබාන් සංවිධානය සහ ඇෆ්ගනිස්තානයේ සහය පළවන බව ද ඔහු මෙහිදී සදහන් කර ඇත.
මේ වනවිට පැරණි තාක්ෂණය සහිතව ක්‍රියාත්මක ඇෆ්ගනිස්තානයේ තඹ ඇතුළු ඛණිජ ආකර චීන තාක්ෂණික සහයෝගයෙන් නවීකරණය කරන බව ද තලේබාන් ප්‍රකාශකයා සදහන් කර තිබේ.
ඇෆ්ගනිස්තාන සතුව පවතින ඇමරිකානු ඩොලර් බිලියන 10 ක් පමණ වන විදේශ සංචිත අවහිර කිරීමට ඇමරිකාව ඇතුළු බටහිර රටවල් ක්‍රියා කරමින් සිටින අතර ඒ හේතුවෙන් එරට ආර්ථිකය දැඩි දුෂ්කරතාවයන්ට මුහුණ දී තිබේ.
