ශ්රී ලංකා රූපවාහිනී සංස්ථාවේ නිල ලාංඡනය නව පාලනාධිකාරිය යටතේ වෙනස් කොට තිබෙනවා.
ඒ අනුව එහි මෙතෙක් කලක් තිබූ හැඩය සහ ‘රූපවාහිනී’ ලෙස භාෂා ත්‍රිත්වයෙන් තිබූ සටහන මීට දින කිහිපයකට පෙර වෙනස් කිරීමට ලක්කර ඇති බව දැකගත හැකියි.
නව සංකේතය මගින් මෙතෙක් කලක් පැවති දෙමළ හා ඉංග්‍රීසි භාෂා ඉවත්කොට සිංහල භාෂාව පමණක් යොදා තිබීම විශේෂත්වයක්.
එමෙන්ම රූපවාහිනී ප්‍රවෘත්ති මැදිරිය මෙන්ම ප්‍රවෘත්ති ඉදිරිපත් කිරීමේ විලාශයද නව පාලනය යටතේ වෙනස් කර තිබෙනවා.
කෙසේ වෙතත් රූපවාහිනි ලාංඡනයෙන් දෙමළ හා ඉංග්‍රීසි භාෂා ඉවත්කිරීම පිළිබදව එම සංස්ථාවේ සේවකයින් දැඩි කළකිරීමට පත්ව තිබෙනවා.
රජයේ ආයතනයක් වන ශ්රී ලංකා රූපවාහිනී සංස්ථාව මෙරට අනෙකුත් භාෂා නොසලකා හැරීමට හිටිහැටියේ කටයුතු කිරීම සංහිදියා සංකල්පයට මෙන්ම රජයේ ප්‍රතිරූපයටද දේශීය වශයෙන් මෙන්ම ජාත්‍යන්තර වශයෙන්ද හානි කරන බවයි ඔවුන් පෙන්වා දෙන්නේ.
ජාතික රූපවාහිනිය මෙරට ජාතික නාලිකාව වශයෙන් 1982 අංක 6 දරන පාර්ලිමේන්තු පනත මගින් ස්ථාපනය කරනු ලැබූවා.
1982 පෙබරවාරි 15 වැනිදා නිල වශයෙන් සිය සේවාව ආරම්භ කොට මේ වන විට වසර 40 ක් ගෙවී තිබෙනවා.
ජපන් ජනතාවගෙන් ශ්රී ලංකා ජනතාවට ත්‍යාගයක් ලෙස ලැබුණු මෙම ආයතනය ශ්රී ලංකා රූපවාහිනී සංස්ථාව ලෙස සිංහල, දෙමළ හා ඉංග‍්‍රිසි භාෂා ත‍්‍රිත්වයෙන්ම සිය සේවා පවත්වාගෙන යනු ලබනවා.
රූපවාහිනී සංස්ථාවේ නව සභාපතිවරයා ලෙස සොනාල ගුණවර්ධන මහතා මෙම වසරේ ජනවාරි මස පත්කරනු ලැබූවා.
ඒ එහි හිටපු සභාපති රෙජිනෝල්ඩ් කුරේ මහතා එම තනතුරින් ඉල්ලා අස්වීමත් සමඟයි.
සියලු ජාතීන් හා සියලු භාෂාවන් එක හා සමාන බවත් ලංකා පවුලේ අපි සියලුම දෙනාම නෑදෑයන් බවත් කියැවෙන ජාතික රූපවාහිනියේ තේමා ගීතය පහතින්,
