පොහොර නොලැබීම හේතුවෙන් තේ අස්වැන්නේ අඩුවක් සිදුව ඇති බව සත්‍යයක් යැයි වැවිලි අමාත්‍ය වෛද්‍ය රමේෂ් පතිරණ මහතා පවසනවා.
ඊයේ (19) කැබිනට් තීරණ දැනුම්දීමේ ප්‍රවෘත්ති සාකච්ඡාවට එක්වෙමින් අමාත්‍යවරයා සදහන් කළේ ඉකුත් අගෝස්තු මාසයේ අස්වනු ගැටලුවක් සිදුවූයේ නැතත් මේ මාසයේදී අස්වැන්නේ ක්‍රමානුකූල අඩුවක් සිදුවී ඇති බවයි.
මේ වන විට අවශ්‍ය පොහොර ගෙන්වා බෙදාහැරීමට කටයුතු කරගෙන යන බැවින් අධෛර්යමත් නොවී වගාකටයුතුවල නිරත වන්නැයි තේ වැවිලිකරුවන්ගෙන් මෙන්ම සෙසු ගොවීන්ගෙන්ද තමන් ඉල්ලා සිටින බව රමේෂ් පතිරණ මහතා මෙහිදී සදහන් කළා.
ශ්‍රී ලංකාවේ තේ නිෂ්පාදනය ගුණාත්මකභාවයෙන් ඉහළ නැංවමින් වගාව ප්‍රවර්ධනයන කිරීමට රජය පියවර රැසක් ගෙන ඇති බවත් වගාව දියුණු කිරීම මිස ආපසු හැරවීමට කටයුතු නොකරන නිසා රජය පිළිබදව විශ්වාසය තබාගෙන කටයුතු කරන්නැයි මෙහිදී ඉල්ලා සිටියා.
මෙම ප්‍රවෘත්ති සාකච්ඡාව අමතමින් අමාත්‍ය ඩලස් අලහප්පෙරුම මහතා සදහන් කළේ කාබනික වගාවට යොමුවීම සම්බන්ධයෙන් රජය මුරණ්ඩු ප්‍රතිපත්තියක නැති බවයි.
මෙය හොඳ ප්‍රතිපත්තියක් වුවද ඉලක්කය කරා යාමට යම් කාලයක් ගතවනු ඇති බවත්, රජය අවශ්‍ය සෑම තැන්වලම පියවරක් පසුපසට ගැනීම පසුබෑමක් නොවන බවත් අමාත්‍ය ඩලස් අලහප්පෙරුම මහතා වැඩිදුරටත් සඳහන් කළා.
