සීමාසහිත ශ්‍රී ලංකා රජයේ වාණිජ විවිධ නීතිගත සංස්ථාව වී තොග රැස්කිරීම සඳහා පිලිපීනයෙන් ආනයනය කෙරුණු ජංගම ගබඩා 55න් 33ක් රජයේ ආයතනවලට නොමිලේ බෙදාදීම හේතුවෙන් රුපියල් කෝටි හතකට ආසන්න මුදලක් පාඩුවී ඇතැයි ජාතික විගණන කාර්යාලය නිකුත් කළ වාර්තාවක සඳහන් වනවා.
මෙම ජංගම වී ගබඩා රජයේ ආයතනවලට නොමිලේ බෙදාදී ඇත්තේ ඒවා වසර හතකට වැඩි කාලයක් තිස්සේ නොවිකිණී පැවතීම නිසා යැයිද එම වාර්තාව සඳහන් කරනවා.
මෙම ජංගම වී ගබඩා රුපියල් කෝටි දහයකට ආසන්න මුදලක් වැය කර මිලදීගෙන තිබූ බව විගණන කාර්යාලය පවසනවා.
රුපියල් කෝටි දෙකකට වැඩි වටිනා ඒකක දහතුනක් 2022 වර්ෂයේදීද රුපියල් කෝටි හතරකට වැඩි වටිනා ඒකක විසි දෙකක් 2023 වර්ෂයේදී ද රාජ්‍ය ආයතන වලට මෙසේ නොමිලේ බෙදා දී තිබූ බවයි පැවසෙන්නේ.
මේ තොරතුරු සඳහන් වන්නේ ජාතික විගණන කාර්යාලයේ 2023 වාර්ෂික වාර්තාවේ බව ලංකාදීප පුවත්පත වාර්තා කරනවා.
