පසුගියදා පැවති කොළඹ ජාත්‍යන්තර පොත් ප්‍රදර්ශනය නැරඹීම සඳහා ජනාධිපති අනුර කුමාර දිසානායක මහතාගේ පැමිණිම සම්බන්ධයෙන් මුහුණූ පොතේ ප්‍රකාශකයෙකු විසින් පළකළ ප්‍රකාශය, පොත් ප්‍රකාශකයන්ගේ සංගමය විසින් හෙළා දැක තිබෙනවා.
එහි ලේකම්වරයා විසින් නිවේදනයක් නිකුත් කරමින් සඳහන් කරන්නේ පොත් ප්‍රදර්ශන පරිශ්‍රයේ පැවති “ළමා පොත් පිළිබඳ ජාතික ප්‍රතිපත්ති යෝජනාවලියේ කෙටුම්පත්” මහජන ප්‍රතිචාර සඳහා එලිදැක්වීමේ සමුළුවට එක්වු ජනාධිපතිතුමාට ප්‍රදර්ශනය නැරඹීම සඳහා ආරාධනා කළ බවයි.
ඒ අනුව පැමිණි ජනාධිපතිතුමා සැමරුම් පොතෙහි සටහන් තබන අවස්ථාවේදී මාධ්‍යවේදීන් සහ මහජනතාව රොද බදිමින් තෙරපෙමින් සුබ පැතීම නිසා A ශාලාවට මෙන්ම B ශාලාවට සුභ පතන්නන් අතරින් ජනාධිපතිතුමා ඉතා අසීරු තත්වයකින් පැමිණි බව ඔහු විසින් පෙන්වා දෙනවා.
ප්‍රකාශකයින් හෝ පාඨක ජනයාගෙන් විරෝධයක් දැක්වු බවට සාවද්‍ය ලෙස මුහුණුපොතේ පලකර ඇති පෝස්ටුවේ පරිදි පැවසීම සංගමයටත්, ප්‍රකාශකයින්ටත්, පාඨකයින්ටත් කරන ලද නිගරුවක් බව එහි සඳහන් වනවා.
අන්තර්ජාලයේ පල කරන ලද අදහස් වත්මන් ජනාධිපතිතුමාගේ ජයග්‍රහණය ඉවසිය නොහැකි පෞද්ගලික හා වෛරී මනෝභාවයක් සහිත පුද්ගලයකුගේ ක්‍රියාවක් බව එම නිවේදනයේ සඳහන්.
වත්මන් ජනාධිපතිතුමා හට පැමිණ සිටි පාඨක ජනතාව විසින් දක්වන ලද අපරිමිත සෙනෙහස තම කුටිවලට වී සිටි අදාල ප්‍රකාශකයාට නොරිස්සු බව පැහැදිලිව ප්‍රකාශ කරන බව ශ්‍රී ලංකා පොත් ප්‍රකාශකයන්ගේ සංගමයේ ලේකම්වරයා පෙන්වා දෙනවා.
