හයවන වරටත් පැවැති කාන්තා පන්දුවාර විස්සයි විස්ස ලෝක කුසලාන ක්‍රිකට් තරඟාවලියේ ශුරතාව දිනා ගැනීමට ඕස්ට්‍රේලියානු කාන්තා කණ්ඩායම ඊයේ (26) සමත් වුණා.
ඒ සත්කාරක දකුණු අප්‍රිකා කණ්ඩායම ලකුණු 19කින් පරාජය කරමින්.
දකුණු අප්‍රිකාවේ කේප් ටවුන් හිදී පැවැත්වුණු තරඟයේ කාසියේ වාසිය දිනාගත් ඔස්ට්‍රේලියාව පළමුව පන්දුවට පහර දීමට තීරණය කළා.
ඒ අනුව පිටියට පිවිසි ඕස්ට්‍රේලියානු කාන්තා කණ්ඩායම නියමිත පන්දුවාර 20 අවසානයේ දී කඩුලු 6ක් දැවී ලකුණු 156කි.
ඕස්ට්‍රේලියාව වෙනුවෙන් Beth Mooney නොදැවී ලකුණු 74 ක් ලබා ගත් අතර ඊට හයේ පහරක් හා හතරේ පහර 9 ක් ඇයගේ ඉනිමට ඇතුළත්.
දකුණු අප්‍රිකාව වෙනුවෙන් පන්දු යැවීමේ දී Shabnim Ismail හා Marizanne Kapp කඩුලු දෙක බැඟින් දවා ගත්තා.
ලකුණු 157ක ඉලක්කයක් හඹා ගිය දකුණු අප්‍රිකා කණ්ඩායමට නියමිත පන්දුවාර 20 අවසානයේ ලබාගත්තේ ලකුණු 137ක් පමණි.
දකුණු අප්‍රිකාව වෙනුවෙන් Laura Wolvaardt පන්දු 48කදී ලකුණු 61ක් ලබාගත්තා.
ඊට හයේ පහර 3ක් සහ හතරේ පහර 5ක් ඇතුළත්.
පන්දු යැවීමේදී ඕස්ට්‍රේලියාව වෙනුවෙන් Megan Schutt, Ashleigh Gardner, Darcie Brown සහ Jess Jonassen එක් කඩුල්ල බැඟින් බිඳ හෙලුවා.
මෙය ඕස්ට්‍රේලියානු කාන්තා කණ්ඩායම අඛණ්ඩව විස්සයි විස්ස ලෝක ශුරතාව දිනු තෙවන අවස්ථාව ලෙසයි ඉතිහාසගත වන්නේ.
