රාවණා බලය සංවිධානයේ කැඳවුම්කරු මෙන්ම මධ්‍යම සංස්කෘතික අරමුදලේ ආගමික කටයුතු අධ්‍යක්ෂවරයා ලෙස කටයුතු කරන පූජ්‍ය ඉත්තෑකන්දේ සද්ධාතිස්ස හිමියන්ගේ මෑණියන් පසුගිය 7 වනදා අභාවප්‍රාප්ත වුණා.
මිය යන විට 85 හැවිරිදි වියේ පසුවූ ලීලාවති සමරසිංහ මහත්මියගේ දේහය බොරැල්ල ජයරත්න මල්ශාලාවේ ප්‍රභූ අමුත්තන්ගේ පරිශ්‍රය තුළ තැන්පත් කිරීමට කටයුතු යොදා තිබුණා.
ඒ අනුව එම දේහයට ගෞරව දැක්වීම සඳහා ඊයේ (08) අග්‍රාමාත්‍ය මහින්ද රාපක්ෂ, අමාත්‍ය නාමල් රාජපක්ෂ, සෞඛ්‍ය අමාත්‍ය පවිත්‍රා වන්නි ආරච්චි, අමාත්‍ය ජොන්ස්ටන් ප්‍රනාන්දු, රාජ්‍ය අමාත්‍ය චන්න ජයසුමන, රාජ්‍ය අමාත්‍ය පියල් නිශාන්ත, ජනාධිපති මාධ්‍ය අධ්‍යක්ෂ සුදේව හෙට්ටිආරච්චි ඇතුළු මහා සංඝරත්නයද විශාල වශයෙන් පැමිණ සිටියා.
ඉත්තෑකන්දේ සද්ධාතිස්ස හිමියන්ගේ මෑණියන්ගේ දේහය මේ වන විට බොරැල්ල මල් ශාලාවේ සිට ඒ මහත්මිය උපත ලැබූ රත්නපුරය – ඉත්තෑකන්ද ප්‍රදේශයට රිය පෙරහැරකින් රැගෙන යමින් පවතිනවා.
උදෑසන 8.30 ට බොරැල්ලෙන් පිටත්වූ රිය පෙරහැර කොට්ටාව අධිවේගී මාර්ගය ඔස්සේ බරවකුඹුක, ඇඹිලිපිටිය, පනාමුර හරහා ඉත්තෑකන්ද ප්‍රදේශයට යාමට නියමිතයි.
දේහය රැගෙන යන අතරතුර මග දිගට ඇයගේ දේහයට ගරු බුහුමන් දැක්වීමටද අවස්ථාව ලබාදී ඇති බව සංඛපාල විහාරයේ භාරකාර කොකාවල කෝසල හිමියන් සඳහන් කරනවා.
මෙම අවස්ථාවට විශාල පිරිසක් ඒකරාශි වී ඇති බව පහත ඡායාරූප මගින් දක්නට හැකියි.
දේහය පිළිබද අවසන් කටයුතු අද පස්වරු 4 ට පවුලේ සුසාන භූමියේදී සිදු කිරීමට නියමිතයි.
