අග්‍රාමාත්‍ය මහින්ද රාජපක්ෂ මහතා සහ විදේශ ඇමති මහාචාර්ය ජී.ඇල්. පීරිස් මහතා වතිකානුවට ගොස් පාප් වහන්සේ හමුවීමට යන බවට කොළඹ අගරදගුරු මැල්කම් කාදිනල් රංජිත් හිමිපාණන් කළ ප්‍රකාශය බැහැර කරමින් විදේශ කටයුතු අමාත්‍යාංශය නිවේදනයක් නිකුත් කර තිබෙනවා.
විදේශ අමාත්‍යාංශය පවසන්නේ අග්‍රාමාත්‍යවරයා හා විදේශ අමාත්‍යවරයා සංචාරයක් සඳහා ඉතාලියේ බොලොග්නා නගරයට පමණක් ගමන් කිරීමට නියමිත බවයි.
එහිදී පැවැතවෙන ජාත්‍යාන්තර උත්සවයකට අග්‍රාමාත්‍යවරයා ඇතුළු ධූත පිරිස සහභාගීවන අතර ඊට ඉතාලි අගමැතිවරයා ඇතුළු අනෙකුත් යුරෝපීය රටවල සම්භාවනීය අමුත්තන් සහභාගීවීමට නියමිත බවද නිවේදනයේ සදහන්.
මෙහිදී යුරෝපයේ පැරණිතම ඉගෙනුම් මධ්‍යස්ථානයක් වන බොලොග්නා විශ්ව විද්‍යාලයේ පැවැත්වෙන ජාත්‍යන්තර සම්මන්ත්‍රණයේ ආරම්භක සැසිවාරයේ ප්‍රධාන දේශනය පැවැත්වීම අග්‍රාමාත්‍ය මහින්ද රාජපක්ෂ මහතා විසින් සිදුකරන බව විදේශ අමාත්‍යාංශය පවසනවා.
කෙසේ වෙකෙසේ වෙතත්, කිසිම අවස්ථාවක වතිකානුවේ සංචාරය කිරීම සඳහා වතිකානුවෙන් ආරාධනයක් හෝ පාප්වහන්සේ මුණගැසීමට අග්‍රාමාත්‍යවරයා විසින් ඉල්ලීමක් හෝ කර නැති බවද නිවේදනයෙහි සදහන්.
අද (07) පැවති ප්‍රවෘත්ති සාකච්ඡාවකදී 2019 පාස්කු ඉරිදා ත්‍රස්ත ප්‍රහාරය පිළිබඳ සත්‍යය යටපත් කිරීමට රජය උත්සාහ කරන බව අගරදගුරුතුමන් චෝදනා කළා.
එහිදී පාප්වහන්සේ ඔහු චෝදනා කළේ ජාත්‍යන්තර ප්‍රජාවට, වතිකානුවට සහ පාප් වහන්සේට ප්‍රහාරය පිළිබඳව වැරදි චිත්‍රයක් ලබා දීමට අගමැතිවරයා සහ විදේශ ඇමතිවරයා උත්සාහ කරන බවයි.
