ශ්‍රී ලංකා මහ බැංකුව නිල වශයෙන් වාර්තා කර ඇති නිල විදේශ සංචිතවල ප්‍රමාණය තිබෙන ප්‍රමාණයට වඩා ඩොලර් බිලියන 1.4කට වැඩි අගයක් බව වෙරිටේ රිසර්ච් සිදුකළ නවතම අනාවරණයකින් පෙන්වා දෙනවා.
සංචිත ප්‍රමාණය වාර්තා කිරීම් අන්තර්ජාතික ප්‍රමිතීන්ට යටත්ව සිදුකෙරුණේ නම් එම අගය ඩොලර් බිලියන 4.9 ක් විය යුතුව තිබූ බව වෙරිටේ රිසර්ච් පවසනවා.
චීන මහජන බැංකුවෙන් ලැබුණු රෙන්මින්බී බිලියන 10ක මුදල් හුවමාරුවක් එනම් ආසන්න වශයෙන් ඩොලර් බිලියන 14ක් සංචිතවලට එකතු කර වාර්තා පළ කිරීම නිසා මෙම තත්ත්වය මතුව ඇති බවත් මුදල් හුවමාරුව අන්තර්ජාතික ප්‍රමිතීන්ට අනුව සංචිත වත්කමක් ලෙස සැලකීමට නොහැකි බවත් ඔවුන් සඳහන් කළා.
අන්තර්ජාතික මූල්‍ය අරමුදලේ ගෙවුම් ශේෂ අත්පොතේ 6 වන සංස්කරණයෙන් සංචිත වත්කම් සම්බන්ධයෙන් වාර්තා කිරීමේ ප්‍රමිතිය හඳුන්වා දී තිබෙනවා.
ඊට අනුව සංචිත වත්කමක් ද්‍රවශීල නොහොත් වඩාත් ම කොන්දේසි විරහිත ආකාරයෙන් පහසුවෙන් ලබාගත හැකි විය යුතුයි.
මෙම ප්‍රමිතිය තෘප්ත කිරීමට චීන මහජන බැංකුවෙන් ලැබුණු මුදල් හුවමාරුව අසමත් බවත් එම මුදල් හුවමාරුව භාවිතයට ගැනීම අරභයා කොන්දේසි පනවා තිබීම එයට හේතුව බවත් සඳහන්
ශ්‍රී ලංකාවේ නිල සංචිතවල ප්‍රමාණය මහ බැංකුවේ වාර්තාවලින් සත්‍ය අගයට වඩා වැඩි කර පෙන්වීමක් සිදුවන බවත් 2025 මැයි මාසයේ රටේ නිල සංචිත ප්‍රමාණය එම වාර්තාවලින් පෙන්වා දුන්නේ ඩොලර් බිලියන 6.3ක් ලෙස බවට යැයිද වෙරිටේ පෙන්වා දෙනවා.
එහෙත් මෙම සංචිත ප්‍රමාණය වාර්තා කිරීම් අන්තර්ජාතික ප්‍රමිතීන්ට යටත්ව සිදුකෙරුණේ නම් එය අගය ඩොලර් බිලියන 4.9 ක් විය යුතුව තිබූ බවද වෙරිටේ කියයි.
කෙසේ වෙතත්, මෙරට නිල විදේශ සංචිත ප්‍රමාණය ඇමෙරිකානු ඩොලර් බිලියන 6.5ක් ඉක්මවා ගොස් ඇති බව ආර්ථික සංවර්ධන නියෝජ්‍ය අමාත්‍ය සහ කම්කරු අමාත්‍ය අනිල් ජයන්ත ද පසුගිය අප්‍රේල් 30 වන දා පැවති මාධ්‍ය හමුවකදී පවසා සිටියා.
එළැඹෙන වසරේදී එම සංචිත ප්‍රමාණය ඩොලර් බිලියන 7 ඉක්මවනු ඇතැයි අපේක්ෂා කරන බව ඔහු පැවසුවා.
‘ශ්‍රී ලංකාව විදේශ සංචිත ගැන වාර්තා කරන ආකාරය ගැන වෙරිටේ රිසර්ච් ආයතනයට අනුබද්ධ ‘ෆැක්ට් චෙක්’ FactCheck.lk දකින ගැටලු’ යන මෙම පැහැදිලි කිරීමට අනුව මෙම තොරතුරු අනාවරණය කර තිබෙනවා.
